Detaje të reja nga vendosja e dy pajisjeve GPS në dy automjetet e shtetasit Eris Çekani mëngjesin e sotëm në Pogradec.
Ngjarja ka ndodhur në Lagjen 2, pranë prokurorisë së qytetit, ndërsa ka qenë roja i prokurorisë që ka vënë re lëvizjet dhe ka lajmëruar policinë. Rreth orës 03:30 të mëngjesit ai ka parë një shtetas duke u shtrirë përtokë e duke vendosur dicka poshtë një makine të parkuar.
Fillimisht është dyshuar për eksploziv, dhe është sjellë nga Tirana grupi i shpërthimeve të kontrolluara. Por pas kontrollit të xhenierëve ka rezultuar se nuk ishte lëndë plasëse, por një aparat GPS për gjurmimin e vendndodhjes se tij.
Eris Çekanit, pronari i dy mjeteve të cilave iu vendosën GPS ka dhënë dëshminë e tij. Ai ka deklaruar se GPS janë porositur nga një grup personash duke akuzuar me emra konkretë vëllezërit Brian dhe Sindi Syzo, Mario Xhangolli dhe Jona Duka.
Në dëshminë e tij në polici, Çekani është shprehur se ka dyshime se GPS është porositur nga një grup personash, konkretisht vëllezërit Brian dhe Sindi Syzo, shtetasi Mario Xhangolli dhe shtetasja Jona Duka (e dashura e Brianit).
Dyshimet e pronarit të mjeteve lidhen me këta persona pasi ka konflikt të hapur prej disa kohësh me ta. Ai ka deklaruar se janë të vetmit që dyshon për këtë ngjarje, pasi nuk ka konflikt me askënd tjetër veç 4 shtetasve të lartpërmendur.
Dy vëllezërit Syzo janë të shpallur në kërkim disa muaj më parë, për shkak të një konflikti. Nga kamerat e sigurisë, është e vështirë të identifikohet personi që i ka vendosur pajisjet poshtë dy mjeteve, pasi sipas informacioneve ai ka qenë i maskuar.
- Çfarë njofton policia për ngjarjen?
Policia ka dalë me një njoftim zyrtar pas kontrolleve që u ushtruan në makinat në pronësi të Eris Cekanit. Forcat blu bëjnë të ditur se nën dy automjetet në pronësi të Çekanit janë konstatuar dy sende të dyshimta, të cilat ishin dy GPS.
“Mëngjesin e sotëm, në lagjen nr. 3, Pogradec, nën dy automjetet në pronësi të shtetasit E. Ç., 39 vjeç, banues në Pogradec (të cilat i lëshon me qira) janë konstatuar dy sende të dyshimta. Në vendngjarje shkuan shërbimet e Policisë dhe nga verifikimet e kryera, rezultoi se nuk ishin lëndë plasëse, por ishin dy GPS. Grupi hetimor vijon veprimet për sqarimin e rrethanave të rasit.”, njofton polcia e Pogradecit.
