Katër fluturime me nisje nga Rinasi janë shtyrë mëngjesin e kësaj të Shtune nga kompania e fluturimit “Wizz Air”, ç’ka ka sjellë pakënaqësi te udhëtarët.
Sipas të dhënave në faqen zyrtare të aeroportit të Tiranës, fluturimi i planifikuar të niset në 6:00 në Malpensa të Milanos, është shtyrë për në 15:35.
Fluturimi “W6 3857” me destinacionin aeroportin e Fiumiçinos në Romës, nga ora 6:15, është shtyrë po ashtu për në 21:20.
Shtyrje me disa orë edhe në nisjen e fluturimit “W6 2234” për në Budapest, që nga planifikimi fillestar më 15:35, është parashikuar të niset më 20:40.
Po ashtu, është shtyrë dhe fluturimi për në Luton të Londrës, por ndryshe nga fluturimet e lartpërmendura, vonesa këtu është 30 minuta. Të paktën kjo është lajmëruar deri më tani.
Udhëtarët u shprehen të indinjuar për mediat me veprimet e njëanshme të kompanisë për shtyrje të fluturimeve. Sipas tyre, kjo mënyrë veprimi tregon papërgjegjshmëri. Ata thonë se do i duhet të presin me orë të tëra në aeroport, ndërsa mes pasagjerëve ka dhe të mitur.
Kompania në fjalë është e njohur për problematika të tilla. Shpesh herë ndodh që fluturimet e kësaj linje të shtyhen me orë të tëra si në rastet e sotme, duke u sjellë pasoja qytetarëve, të cilët udhëtojnë për arsye të ndryshme.
