Ish-ministri i Drejtësisë, Ylli Manjani shprehet se kryebashkiaku i Tiranës Erion Veliaj duhet të ishte në burg.
Reagimi vjen një ditë pas transmetimit të media të një interviste të një biznesmeni italian që zbulon detaje të reja mbi përfshirjen e Veliajt në aferën e incenratorëve.
Manjani shprehet se “jo detyrimisht për drejtësi, por për barazi para ligjit, me kaq sa i janë zbuluar Erionit duhet të ishte në burg”.
Reagimi
Në një postimin në rrjetet sociale, ish-ministri shkruan:
Ja pra që çështja e inceneratorëve nuk është hetuar thuajse fare.
SPAK kishte dhe ka detyrë të nxirrte në sipërfaqe atë të padukshmen, sepse aty është e vërteta e kësaj çështje.
Me variantin tradicional, kap e fut në burg njerëz për presion dhe sajo akuza që të kënaqet populli dhe trashet në pushtet politika, nuk del e vërteta. Përkundrazi ajo varroset.
SPAK e bëmë për të hetuar atë të padukshmen e jo për të bërë prokurorinë tradicionale bolshevike.
Intervista e Italianit tek Piranjat është provë flagrante që e vërteta është e nëndheshmja e jo ajo që serviret në SPAK dhe nga SPAK.
Italiani sot duhet të ishte dëshmitari kryesor i SPAK dhe jo i akuzuari sipas variantit tradicional…
Meqë ra fjala te varianti tradicional, përse Erion Veliaj nuk është në paraburgim si gjithë të tjerët?!
Jo detyrimisht për drejtësi, por për barazi para ligjit, me kaq sa i janë zbuluar Erionit duhet të ishte në burg.
Ata që janë në burg dhe/ose nën akuzë zyrtare për këtë çështje janë për thashetheme e aludime…
Për Erionin, krahas shkresës së firmosur, del edhe një dëshmitar që na tregon një aferë ku ai është prezent.
Por më interesantja e Italianit ishte lidhja e Erionit me Ali Aliabadin e Iranit..!
Me një Aliabad atje e një Alibashë këtu do të rruajë dhe zgjedhjet…!
Po ai muhabeti i hackerave të Iranit, qënka loja?!
Kush ishte “kundërofensiva” që i bëri Ai hackerave?! Dergimi i Erionit të Tiranës për të blerë vjetërsirën në Rumani me paret e Aliut të Teheranit?
Uau, uau, uau…!
Siç kemi thënë jo pak herë, problemet tona nuk na vijnë nga Teherani as nga Irani, por thjesht nga Tirana dhe Tirani.
Në fakt ato “hackerat” nuk kanë nxjerrë asgjë interesante nga këto të botës së padukshme. Vetëm emaile zyrtarësh se ku prenotojnë pushimet.
Të gjitha të dhënat serioze i ka nxjerrë qeveria e patronazhistëve.
