Kryedemokrati Sali Berisha ka prezantuar kandidatin e koalicionit “Bashkë Fitojmë” për bashkinë e Vaut të Dejës këtë të premte.
Në krah të Zef hilës, Berisha vendosi theksin te potenciali i zonës për t’u zhvilluar nëpërmjet turizmit dhe premtoi që kjo do të bëhet realitet pas 14 majit, nën drejtimin e ish-deputetit demokrat.
“Bashkia e Vaut të Dejës ka potenciale të biznesit, të bujqësisë, të turizmit. Vau i Dejës mund të shndërrohet në një nga bashkitë më të zhvilluara të vendit. Ne vijmë në këto zgjedhje më 14 maj me një entuziazëm që ka përshkruar sot gjithë vendin. Ky entuziazëm, është premtim i madh se 14 maji do të jetë dita e ndryshimit të shumëpritur.
14 maji në të vërtetë është ditë zgjedhjesh të qeveritarëve vendorë. Realisht, zgjedhjet e 14 majit janë zgjedhjet e jetës sonë. Janë zgjedhjet me të cilat ne, më shumë se në çdo zgjedhje tjetër se ato të 22 marsit të vitit 1992, vendosim për fatin e Vaut të Dejës, Shkodrës dhe mbarë Shqipërisë. Janë zgjedhje që për fatin tonë, firmosim për përmbysjen e monizmit të dytë, që u instalua në këto 8 vite në Shqipëri”, u shpreh Berisha.
