Kryetari i Bashkisë së Tiranës, Erion Veliaj duket sikur jeton në një “univers paralel” pasi na ka habitur të gjithë kur deklaron se në kryeqytet nuk ka trafik.
Gjatë një interviste për emisionin “Opinion”, Veliaj vijon deklaratën e tij duke u justifikuar se edhe në qytetet e mëdha gjithmonë ka ngarkesë trafiku, teksa silli si shembuj disa nga kryeqytetet e vendeve të BE.
“Më rezulton që përveç të orës së pikut qartazi kur të gjithë shkojmë në punë apo kthehemi nga puna, ka një rrjedhshmëri normale. Ditët e shiut apo orët e pikut janë momente që në çdo qytet ka probleme të trafikut. Sot po të shikojmë në horizont, ka një rrjedhje të trafikut që nuk më duket dramatike. Por qyteti ka fituar një mushkri. Nëse sot hapim Il Meteo që tregon cilësinë e ajërit në qytet nga Koperniku që është sateliti i BE. Kjo ka qenë e kuqe, sot është mirë, ndërkohë që ka qenë keq apo shumë keq. Trafiku është një sfidë e jashtëzakonshme për çdo qytet të madh fjala vjen, nuk ka trafik në Janinë,por ka në Athinë, nuk ka në Bari, por ka në Romë dhe Milano dhe nuk ka trafik në Këlcyrë dhe në Has, por ka në Tiranë. Në Tiranë të regjistruar janë 180 mijë makina, ndërkohë bashkë me ato që vinë nga rrethet janë 250 mijë makina në të njëjtin qytet me akset që kemi trashëguar nga koha e Italisë. Ajo që më rezulton nëse në hyrje të Tiranës duheshin dy apo tre orë sot kalon për pak minuta”-tha Veliaj.
- Në realitet, Tirana është një kaos i vërtetë për shkak të trafikut të rënduar:
Në fakt situata e rënduar e trafikut është e njëjtë çdo ditë në Tiranë ku qytetarët përballen me situatën kaotike, rrugët e ngushtuara dhe betonizimin. Përgjegjës për situatën kaotike në kryeqytet është kryebashkiaku socialist Erion Veliaj i cili e ka kthyer Tiranën në një kantier të madh ndërtimi, fluks makinash dhe ajër i ndotur.
Fatkeqësisht, dita e një qytetari në Tiranë nis me stres e ankth, ku të gjithë vrapojnë për të arritur në orar në destinacionet e tyre, disa të tjerë duhet të dalin një orë para nga shtëpia për të kapur autobusin, pasi metropoli zhytet në kaos trafiku që në orët e para të mëngjesit.
Trafiku rëndohet edhe në orët e pasdites, kur qytetarët kthehen nga puna. Një dite të lodhshme, i shtohet edhe trafiku i rënduar vetëm sepse kryebashkiaku nuk tregon përgjegjshmëri ndaj qytetarëve të tij.
