Mosdekretimi i propozimit për kreun e ri të SHISH dhe Arben Ahmetaj, Rama lë konferencën pa përgjigje
Kryeministri Edi Rama nuk iu përgjigj pyetjes së gazetarëve gjatë një dalje për mediat këtë të Mërkurë, lidhur me mosdekretimin ende nga Bajram Begaj, të propozimit të tij për kreun e ri të SHISH.
Pa përgjigje la edhe një pyetjeje lidhur me deputetin socialist Arben Ahmetaj, nën hetim për çështjen e inceneratorëve.
- Pyetje: Zoti Kryeministër, a keni informacion pse presidenti i Republikës po heziton të dekretojë emrin që ju i keni propozuar për në krye të SHISH duke iu referuar edhe një takimi të fundit që keni pasur me zotin Albin Kurti, keni marrë informacion pse ai është shkarkuar nga detyra ku ai shërbente për Shërbimin Informativ të Kosovës
Rama: Nga unë mësohuni të dëgjoni pagat, pagat, pagat, ekonomia, ekonomia, ekonomia, mirëqenia e njerëzve, mirëqenia e njerëzve, mirëqenia e njerëzve dhe transformimi i përgjithshëm dhe modernizimi i vendit tonë. Kurse këto pastaj, thashethemet e katundit tonë politik dhe mediatik i kemi bërë bashkë për shumë vite, unë nuk kam as dëshirë, as energji, as nevojë dhe mbi të gjitha as kohë për tu marrë me këto.
- Pyetje: Ish-numri dy i qeverisë tuaj tashmë po hetohet nga SPAK me katër akuza. A do merrni vendim politik, zoti Rama?
“Kjo është pjesë e këtyre thashethemeve. Faleminderit”, tha Rama, e më pas u largua.
