Komisioni i Pavarur i Kualifikimit, KPK shpalli këtë të mërkurë vendimin për konfirmimin në detyrë të prokurores së Durrësit, Englantina Shehu. Vendimi u mor në mënyrë unanime nga trupa e KPK e kryesuar nga Etleda Çiftja, me relatore Suela Zhegun dhe anëtare Alma Faskajn.
Gjatë seancës dëgjimore me 28 mars, Shehu dha shpjegime për burimet financiare për blerjen e një automjeti nga bashkëshorti, si dhe për dy çështje profesionale. Subjekti paraqiti argumentim ligjor për një pjesë të të ardhurave të bashkëshortit nga puna e tij që nuk ishin konsideruar prej KPK-së, duke këmbëngulur se ishin të ligjshme dhe kërkoi përfshirjen e tyre në analizën financiare. Shehu mori vlerësim pozitiv për pastërtinë e figurës.
Englantina Shehu përfundoi studimet në Shkollën e Magjistraturës në vitin 2014 dhe u emërua prokurore pranë Prokurorisë së Rrethit Gjyqësor Fier. Prej vitit 2021, ajo e ushtron detyrën në Prokurorinë e Durrësit.
