Sulmi ndaj Top Channel për gazetaren e kronikës Anila Hoxha është realizuar duke ndjekur një mekanizëm mafioz të organizuar shumë mirë prej autorëve.
Për breshërinë e kallashnikovit, që i mori jetën rojës së sigurisë Pal Kola dhe shkatërroi fasadën e televizionit nuk ka ende një autor, ndërsa gazetarja Hoxha ka zbuluar për “Ëake Up” detaje nga momentet e para të ngjarjes.
Hoxha tregoi se personi i parë që e ka parë 60-vjeçarin e ndjerë në minutat e fundit të jetës ka qenë një kolege e saj, e cila ishte e traumatizuar.
“Dëshmitarja e parë ka qenë një kolege e imja që s’po ia përmend emrin, dhe ajo kishte mbaruar turnin dhe po priste oficerin e Policisë e traumatizuar dhe më thoshte: ‘Pse po vonojnë?’”, zbuloi ajo.
Më pas Hoxha tha se ka dyshime që ish-dhëndri i viktimës, Roberto Papçi dyshohet se merret me trafikim klandestinësh dhe para se të arrestohej në Vlorë ka qenë në Gjirokastër.
“Është djegur një Range Rover, autorët, mënyra se si kanë lëvizur, tregon që ka qenë e mirëmenduar. Ish-dhëndri i Pal Kolës, ky shtetas dyshohet se merret me trafikim klandestinësh, dhe është shoqëruar bashkë me një shokun e tij. Ai u ndalua në Vlorë dhe u mësua se ka qenë dhe në Gjirokastër ditën e djeshme edhe është lënë i lirë.
Përpikmëria, shpejtësia, makina që kishin zgjedhur, targat e vjedhura…tregon për një mekanizëm mafioz të organizuar”, tha gazetarja e kronikës.
