Kandidati i Partisë Demokratike për Bashkinë e Elbasanit, Luçiano Boçi ka reaguar pas ngjarjes që ndodhi gjatë mesnatës në ambjentet e Top Channel.
Përmes një postimi në rrjetin e tij social fb, Boçi shkruan se ky është një sulm ndaj fjalës së lirë, ndërsa ka bërë thirrje për zbardhjen urgjente të ngjarjes.
Gjithashtu Boçi është ndalur edhe te humbja e jetës së punonjësit të sigurisë, ku sipas tij e bën akoma më tragjike ngjarjen dhe është një tjetër jetë e pafajshme që humb nga breshëritë e plumbave brenda një kohe të shkurtër.
Postimi i plotë:
Sulmi i armatosur ndaj Top Channel është një akt terrorist që kërkon përgjigje të menjëhershme!
Të qëllosh me breshëri plumbash ndaj godinës së një medie kombëtare është të sulmosh fjalën e lirë dhe një prej pushteteve më të rëndësishme në vend!
Humbja e jetës së punonjësit të kompanisë së sigurisë, Pal Kola, e bën akoma më tragjike ngjarjen dhe është një tjetër jetë e pafajshme që humb nga breshëritë e plumbave brenda një kohe të shkurtër.
Siguria publike në vend është në ditët e saj më të zeza! Kjo është një ngjarje që duhet zbardhur urgjentisht!
Ngjarja ndodhi rreth orës 01:00, ku persona ende të paidentifikuar, u afruan me një automjet tip ‘Range Rover’ ma targa të vjedhura dhe hapën zjarr në drejtim të Top Channel. Në vendin e ngjarjes janë sekuestruar të paktën 25 gëzhoja kallashnikovi, ndërsa një nga plumbat ka përfunduar në trupin e punonjësit, duke i marrë jetën.
Pas ngjarjes, autorët janë larguar, ndërsa në aksin Tiranë-Durrës është gjetur automjeti që kanë përdorur në krim bashkë me dy armë tip kallashnikovi.
Nuk dihen ende shkaqet e ngjarjes së rëndë, ndërsa rasti po hetohet nga policia.
