Kryetari i PD-së, Sali Berisha u shpreh këtë të Hënë se kandidatët që nxjerr grupi Alibeaj për zgjedhjet lokale të 14 Majit, janë në të vërtetë kandidatë të Edi Ramës.
“Kandidatët e Alibashës dhe Lulzim Bravës janë kandidatë të Edi Ramës. Ata nuk kanë asnjë lidhje me PD-në. Ata janë vegla që i përdor Basha dhe Rama kundër pluralizmit”, tha Berisha në përgjigje të interesit të gazetarëve në një konferencë për mediat.
“PD do triumfojë, nuk ka asnjë mëdyshje. Koha provoi në mënyrë profetike rëndësinë e misionit të demokratëve në përmbysjen e monizmit në Shqipëri. Këto i kanë kuptuar të gjithë. Kandidatët e Edi Ramës, janë një apo dy, vijnë tërësisht nga bota e mafies, e cila kërkon të shpëtojë sistemin monist që ka vendosur”, shtoi ai.
Grupi Alibeaj që mban logon e PD, konfirmoi dje 16 kandidatë për kryetarë bashkie (nga 61 bashki), ndërsa sot pritet të merret vendimi për daljen apo jo me kandidatë në Kurbin dhe Vaun e Dejës. Mes bashkive ku nuk do të ketë kandidatë janë Durrësi, Elbasani dhe Shkodra.
Deputetet brenda grupit Alibeaj kanë qenë të ndarë për mënyrën e pjesëmarrjes në këto zgjedhje. Shumë prej tyre kanë qenë kundër daljes me kandidatë, teksa janë shprehur se duhet të mbështeten kandidatët e dalë nga procesi i primareve. Këta të fundit garojnë nën siglën e koalicionit “Bashkë Fitojmë” i drejtuar Sali Berisha.
Deputeti Dashnor Sula konfirmoi publikisht se është kundër nxjerrjes së kandidatëve nga grupi Alibeaj. “Ne nuk duhet të nxjerrim kandidat kundër kandidatëve të PRIMAREVE. Unë distancohem nga kjo lëvizje. Është e gabuar të çajmë votën opozitare. Ndihmon partinë në pushtet”, shkroi ai në një postim në rrjetet sociale.
Deputeti tjetër demokrat Agron Gjekmarkaj i bëri thirrje Enkelejd ALibeajt t’ia dorëzojë vulën e PD-së Sali Berishës. “Me shqeteson ‘non grata’ e tij por shkolla politike shumë me teper, poterexhinjtë folklorikë e zgrapes që presin qarin pranë tij po kaq. Kjo nuk me pengon të pranoj se ai e perdor vulen, ti njoh zotesinë. Ne jo. Ai ka njerez, ne nuk paskemi 61 veta. Duket grotesk…, shprehet ai.
Gazmet Bardhi po ashtu tha se s’ka qenë dakord që të kishin kandidatë në disa prej bashkive ku janë vendosur të tillë. “Nuk kam qenë dakord që në Tiranë të kishte kandidat nga Partia Demokratike e Shqipërisë. Kjo nuk i do të thotë se nuk do mbështes kandidaturat zyrtare të PD-së. Por natyrisht që kam qenë se të gjithë demokratët së bashku do të duhet të bënin betejë kundër Erion Veliajt. Unë bëra thirrja që ne, pjesa e përgjegjshme e PD të mos i çonim demokratët në përplasje dhe betejë mes nesh. Është miratuar një numër i caktuar kandidaturash. Disa emra janë tërhequr”, shkroi Bardhi në rrjetet sociale.
Ndërkohë, shumë nga bazat e grupit Alibeaj në disa bashki kanë vendosur të mbështetin si kandidatë ata të primareve. Kryetarët e disa prej tyre e kanë shprehur këtë qëndrim edhe publikisht.
