Deputeti i PD-së, Oerd Bylykbashki ka deklaruar se e gjithë administrata është nën presion nga qeveria Rama për të ndikuar në procesin zgjedhor.
Pasi SPAK nuk pranoi kallëzimin e tij penal për aplikacionin “Aktivisti”, Bylykbashki tha se ky institucion duhet të vendosë para drejtësisë përgjegjësit dhe t’i japë mesazhin qytetarëve se vota e tyre mbrohet.
“E tërë administrata është në presion kriminal për të ndikuar në procesin zgjedhor dhe në votën e tyre.
Denoncimet që PD ka marrë vazhdimisht nga qytetarët e thjeshtë, punonjës të administratës, nga ekspertë të IT të cilët kanë identifikuar shkeljet flagrante të të drejtave dhe lirive që kanë shtetasit nëpërmjet këtij aplikacioni të përdorur nga qeveria dhe administrata, nga drejtuesit e ministrive apo institucioneve të tjera.
Detyra e SPAK është ti vërë përpara përgjegjësisë të gjithë ata jo vetëm për të ndëshkuar por edhe për të dhënë një mesash të qartë që zgjedhjet mbrohen, që jo më kot legjislatori ka dhënë rregulla kaq të ashpra dhe dënime të rënda për cenimin e të drejtave të zgjedhësve.
Presim pas asnjë humbje kohe dhe pa burokracitë që ndeshëm sot, ku SPAK nuk pranoi që ta merrte në dorëzim drejtpërdrejt. Do e depozitojmë me postë që askush të mos ketë më alibi dhe SPKA të veprojë me shpejtësi”, tha Bylykbashki.
