Makinacioneve për të fshehur dështimin e qeverisë për t’i ofruar paga dhe kushte dinjitoze pune, profesionistëve në sektorin e shëndetësisë, Edi Rama zgjodhi ta mbulojë edhe sot duke mbjellë “terror” me kërcënimet drejtuar studentëve të “Universitetit të Mjekësisë”, teksa preu shiritin e spitalit të ri për sëmundjet e brendshme në QSUT.
Më shumë sesa shqetësimi për braktisjen e vendit nga profesionistët e fushës, pasi mjekët dhe infermierët e aftë po emigrojnë, Rama e adresoi problemin e “hemoragjisë” së bluzave të bardha, si sfidë të qeverisë së tij sepse “gjoja” shpenzon për të shkolluar individë që zgjedhin të mbushin boshllëqet e sistemit gjerman të shëndetësisë.
Kreu i ekzekutivit iu rikthye kërcënimeve të hapura ndaj studentëve të mjekësisë e infermierisë duke njoftuar aplikimin e një politike të diferencuar, përçmuese ndaj atyre që zgjedhin të largohen drejt Gjermanisë.
Sipas kryeministrit ka ardhur koha që të adresohen problematikat, pasi shteti nuk mbulon dot financimet për sistemin shëndetësor gjerman, ndaj një ndër masat, ashtu siç e kishte paralajmëruar 6 muaj më parë është kushti për të marrë diplomën pas praktikës në spitale.
Rama tha se nuk do ndalohet lëvizja e lirë e studentëve, por do të ketë një politikë të diferencuar të kostos dhe tarifës për ata që vendosin të qëndrojnë në Shqipëri për një periudhë të caktuar kohe.
“Nuk mundet dot Shqipëria të financojë shëndetësinë gjermane, këtë ja kam thënë edhe palës gjermane. Nuk mund të pranojmë që një student të paguaj 1/16 e kostos së studimit, pjesën tjetër ta mbulojë shteti me kontributet e taksapaguesve, në fund ai të marri diplomën dhe të ikë në Gjermani. Patjetër që nuk ndalojmë lëvizjen e lirë dhe s’mund të mbajmë askënd me zor, ama do bëjmë një politikë të diferencuar të kostos dhe tarifës në raport me angazhimin dhe konkretizimin e angazhimit për të qëndruar në Shqipëri për një periudhë kohë të caktuar”, u shpreh kryeministri.
Më tej, Rama nënvizoi se diskutimi për këtë plan të ideuar prej tij do të zbresë në nivel rektorati, por asgjëkundi nuk përmendi faktin se në një vend demokratik dhe ku janë familjet ato që sakrifikojnë për të paguar shpenzimeve e studimeve universitare të të rinjve, liria e zgjedhjes për të zhvilluar karrierën, nuk mund të pengohet me vendim qeverie.
“Ashtu si kundër besojmë se është koha që studimet të mos mjaftojnë për të marrë diplomën e mjekësisë, por të duhet edhe praktika. Deri në fund të praktikës, studentët s’do pajisen me atë lejen që kthehet në biletë për të ikur. Është e pamundur të garantojmë një shërbim shëndetësor të standardeve europiane, po qe se burimet tona njerëzore që zhvillohen me sakrifica të gjithanshme, të mos mjaftojnë për të arritur objektivat. Ne do ta shtrimë diskutimin edhe me rektoratin, edhe me komunitetin që të bëjmë politikën më të drejtë të mundshme”, deklaroi Rama.
