Raporti vjetor i DASH për Shqipërinë ishte një “mënxyrë” e vërtetë për qeverisjen e Edi Ramës, me Departamentin e Shtetit që kritikonte vendin për pavarësinë e munguar dhe integritetin e gjyqësorit, pavarësisht ngritjes së institucioneve të reja të drejtësisë.
DASH gjithashtu vendosi theksin te mungesa e mediave të pavarura dhe korrupsioni i vazhdueshëm në qeverisje, në organet e zbatimit të ligjit dhe në institucionet lokale, si probleme akute të Shqipërisë.
“Ndonëse kushtetuta parashikon një gjyqësor të pavarur, presioni politik, frikësimi, korrupsioni dhe burimet e kufizuara e penguan gjyqësorin të funksiononte plotësisht, në mënyrë të pavarur dhe efikase”, thuhet në raport.
Lidhur me raportin ka reaguar edhe deputeti i Partisë Demokratike, Luçiano Boçi, duke u shprehur se DASH tregoi Shqipërinë e vërtetë me korrupsionin e frikshëm që ngre krye në qeveri dhe mediat e kapura prej Edi Ramës.
Sipas Boçit, Shqipëria të cilës i referohet DASH-i është e bukur vetëm për Edi Ramën dhe ata që i qëndrojnë pas kryeministrit, ndërsa realiteti është se vendi ka ngecur në stanjacion, duke mos bërë progres.
REAGIMI I BOÇIT
Babëzia dhe egoja e sëmurë e Edi Ramës për të kapur çdo pushtet dhe kufizimi i çdo mediumi për të thënë i lirë dhe i pavarur atë që sot po ndodh në Shqipëri, po e çojnë vendin në zgrip të kufizimit të demokracisë si kurrë më parë.
Raporti i Departamentit Amerikan të Shtetit praktikisht ka rrëzuar një qeveri të kalbur që qëndron ende në pushtet me forcën e parave të pista dhe shpërdorimit të çdo resursi shtetëror sa herë që ka procese zgjedhore.
A ka sot Shqipëria drejtësi të pavarur ashtu siç parashikohet në kushtetutë? “Presioni politik, frikësimi, korrupsioni dhe burimet e kufizuara e penguan gjyqësorin të funksiononte plotësisht, në mënyrë të pavarur dhe efikase”, thuhet në raportin e DASH.
A ka sot korrupsion në të gjitha nivelet e qeverisjes? “Korrupsioni ishte i pranishëm në të gjitha degët dhe nivelet e qeverisjes, përfshirë edhe prokurimin publik dhe partneritetet publiko-private”, thuhet në raportin e DASH.
Por e dhëna më shqetësuese në raportin e DASH, lidhet me gjendjen e medias në Shqipëri! “Qeveria, partitë politike, bizneset dhe grupet kriminale u përpoqën të ndikonin në media në mënyra të papërshtatshme dhe jotransparente”. Rasti më flagrant i përmendur në raport është ai i shembjes së “Prestige Resort”, të pronarit të “Focus Media Group”, Irfan Hysenbelliu, në dhjetorin e vitit të kaluar!
Kjo është panorama e zezë e një Shqipërie që është e bukur vetëm për Edi Ramën dhe pushtetarët e tij. Kjo është Shqipëria që nuk bën progres! Kjo është Shqipëria që ka ëndërruar Edi Rama në projektin e tij për të rikthyer diktaturën në çdo qelizë të shoqërisë shqiptare! Kjo është Shqipëria që duam të ndryshojmë! E nisim ndryshimin nga qytetet tona!
