Kolegji Zgjedhor pranë Gjykatës Administrative të Apelit ka vendosur regjistrimin në zgjedhjet lokale të 14 Majit të “Lëvizjes Bashkë”, me kryetar Arlind Qorrin.
Këtë të Martë, Kolegji pranoi ankimin e “Lëvizjes Bashkë” që kërkoi rrëzimin e vendimeve të KQZ-së dhe KAS. Të dy institucionet, më herët, refuzuan të regjistrojnë “Lëvizjen Bashkë” në zgjedhjet e 14 Majit.
Vendimet e KQZ dhe KAS megjithatë u rrëzuan nga Kolegji Zgjedhor, që vendosi detyrimin e KQZ të regjistrojë në zgjedhje partinë politike Lëvizja Bashkë si subjekt zgjedhor për lokalet e 14 Majit.
Pas vendimit të gjykatës, kryetari i LB Arlind Qorri, i cili do të garojnë për bashkinë e Tiranës me logon e partisë së re, tha se e drejta u vu në vend.
“Përpara pak minutash Kolegji Zgjedhor na dha të drejtë duke vendosur ta detyrojë Komisionerin Qendror të Zgjedhjeve të regjistrojë Lëvizjen Basgkë si parti politike me të drejta të plota në zgjedhjet e 14 majit. Kjo është një ditë e shumëpritur nga ne, e shumëpritur nga mijëra qytetarë që kanë nënshkruar për themelimin e Lëvizjes Bashkë, e shumëpritur nga mbi 5000 qytetarë që kanë nënshkruar që ne të marrim pjesë në zgjedhje. Paligjshmëria dhe padrejtësia do të kishte një fund. Ky fund fatmirësisht erdhi, pavarësisht makinacioneve që nisën me Gjykatën e Rrethit Gjyqësor Tiranë, me gjygjtarin famëkeq Zhukri e komisionerin famëkeq Celibashi dhe tre anëtarët famkëqij të KAS-it”, u shpreh Qorri.
“Kjo nuk është fitore vetëm për ne, aktivistët e Lëvizjes Bashkë. Është fitore për çdokënd që do të jetë si ne, në pozitën tonë në të ardhmen. Kjo është fitore për qytetarët shqiptarë, pluralizmin politik, për aq pak demokraci sa kemi në Shqipëri. Ne demokracinë duhet ta mbrojmë, duhet ta zgjerojmë, duhet ta fuqizojmë dhe ky vendim është një ogur i mirë në këtë rrugë”, shtoi ai.
Arlind Qorri u zotua se “ne do të nisim fushatën zgjedhore për pak ditë në bashkinë e Tiranës”.
“Unë ju premtoj që do të jetë fushata më e pazakontë, më e fortë dhe më shpresëdhënëse që është parë ndonjëherë në këto 30 vite pluralizëm në Shqipëri”, shtoi më tej.
