Në Gjykatën e Posaçme po zhvillohet procesi gjyqësor për vrasjen e Vajdin Lames dhe Klodian Saliut. Këtë të hënë do të dëshmojë bashkëpunëtori i drejtësisë Luftar Reçi, i cili ka rrëfyer për hetuesit detaje për mënyrën si u organizuan vrasjet e 18-të viteve më parë dhe autorët e tyre.
Kërkesa e Reçit për të dëshmuar me “Skype” nuk u pranua dhe Emiljano Shullazi kërkoi në gjyqin e mëparshëm që të paraqitet në sallë dhe “ta shohë në sy” kur jep deklaratën mbi ngjarjet e rënda kriminale.
Reçi nëpërmjet një letre drejtuar GJKKO shprehej se dërgimi i tij në gjykatë mund të jetë i rrezikshëm, pasi është “si të dërgosh qengjin mes ujqërve”.
“Nuk kam më mundësi e as fuqi të paraqitem në gjyq. Kam ardhur 5 herë dhe gjyqi është shtyrë. Unë jam paraqitur për respekt të drejtësisë. Jam i sëmurë prej vitesh me diabet dhe probleme të tjera shëndetësore. Kërkoj të dëshmoj me skype. Nëse avokatët kanë dyshime, të jenë prezentë tek unë dhe 2-3 gazetarë. Kam arsye shëndetësore dhe sigurie vajtje-ardhje. Ardhja ime në gjykatë është si të dërgosh qengjin mes ujqërve”, thuhej në deklaratën e Reçit.
Por mëngjesin e sotëm nga burgu i Drenovës ku vuan dënimin, Reçi është transporuar drejt GJKKO nën masa të rrepta sigurie dhe po realizohet ballfaqimi i tij në gjyq me të akuzuarit.
Me kërkesë të SPAK, trupi gjykues vendosi që seanca të mbahet me dyer të mbyllura, me argumentin se cënohet siguria e dëshmitarit dhe në të njëjtën kohë mund të bëhen të dhëna publike që mund të cënojnë procesin.
Avokati i të akuzuarit Plarent Dervishaj, i cili nuk ndodhet pas hekurave por endet i lirë në Dubai, tha se nuk ka arsye që gjyqi të zhvillohet i mbyllur.
“S’ka asnjë arsye të zhvillohet proces i mbyllur. S’ka të dhëna sekrete, pasi dëshmia e Reçit është e rremë”, tha avokati.
I kundërt ka qenë argumenti nga avokatja e Emiljano Shullazit, i cili ka qenë pro vendimit të GJKKO. “Procesi me dyer të mbyllura. Mjaft me publicitet!”, tha përfaqësuesja ligjore e Shullazit.
Të pandehur për këto dy vrasje janë marrë, Viktor Ymeri, Emilajno Shullazi, Plaurent Dervishaj, Lulzim Berisha, Indrit Rusi, Indrit Taullai dhe Luftar Reci.
