Të majtët dhe të djathtët e grupit “Alibeaj” kanë bashkuar mbrëmjen e sotme votat në Parlament për të miratuar një paketë ndryshimesh në Kodin Rrugor, që ishte propozuar prej verës së vitit të shkuar nga DPSHTRR dhe më pas u paraqit si dy drafte të ndryshme, një nga Enkelejd Alibeaj dhe tjetri nga Taulant Balla, në Komisionin e Veprimtarive Prodhuese.
Pas diskutimeve të gjata në nivel komisioni, Kuvendi bashkoi dy nismat në një dhe ndryshimet në Kodin Rrugor u miratuan sot me 101 vota pro, duke marrë dakordësinë e dhjetëra deputetëve të Partisë Demokratike.
Një nga ndryshimet më të rëndësishme të Kodit Rrugor, është ai për zgjatjen e vlefshmërisë së patentave deri në 15 vite. Gjithashtu nga momenti që ndryshimet hyjnë në fuqi në disa autostrada të vendit që plotësojnë standartet infrastrukturore, shpejtësia e lejuar do të jetë deri në 130 km/h.
Gjithashtu qytetarët do të kenë më shumë hapësira për të parkuar pa qenë të detyruar të paguajnë, pasi Kodi i ri Rrugor i detyron bashkitë të sigurojnë pa pagesë 50% të parkingjeve.
Një masë tjetër lehtësuese është ajo që lidhet me pagesën e gjobave, të cilat do të paguhen me 50% të vlerës, nëse pagesa kryhet brenda 15 ditësh nga ndëshkimi prej policisë, ndersa më tutje aplikohet kamatëvonesa.
Një element tjetër mjaft i rëndësishëm është dhe mënyra e patrullimit të policisë rrugore, duke iu kufizuar efektivëve ngritjen e patrullave në cdo cep të rrugëve nacionale apo të lagjeve, siç jemi mësuar rëndom të shohim.
Po ashtu një nga pikat me rëndësi në këtë paketë ndryshimesh në Kodin Rrugor lidhet me drejtuesit e rinj të mjeteve të kategorisë B, të cilëve në dy vitet e para të përdorimit të patentës, do t’u lejohet të drejtojnë vetëm mjete motorike me fuqi specifike 55 kë/ton (e thënë në zhargon jo më të mëdha se 75 kf për masën 1000 kg të makinës).
Një propozim për përdorimin e automjeteve me fuqi të ulët motorrike u bë në media nga ekspertët rrugorë edhe pas aksidentit fatal në mbikalimin e “Saukut”, ku 20-vjeçari Klevis Ruçaj që humbi jetën së bahsku me pasagjeret Sikela Përroj dhe Erisilda Abedini, drejtonte një automjet “Audi A8” edhe pse ishte pajisur me leje drejtimi vetëm një vit më parë.
Eksperti i sigurisë Fatjon Softa tha se persona që kanë më pak se 3 vjet që kanë marrë patentën nuk duhen lejuar të lëvizin me mjete mbi 2 mijë kubikë fuqi.
“Është një moment të bëhet një analizë për të parandaluar ngjarje të tilla që mund të kishte qenë edhe më fatale nëse i riu do të kishte përplasur edhe automjetin tjetër para se të binte nga mbikalimi. Nuk mund të lëviznin me mbi 2000 mijë kubikë mjete për ata që kanë deri në 3 vjet që kanë marrë patentën. Të gjitha vendet e BE e kanë të ndaluar që njerëz të tillë të jenë drejtues mjetesh të rënda”, tha Softa.
Edhe eksperti i sigurisë rrugore, Islam Qibini propozoi diçka të ngjashme.
“Në BE, drejtuesit e mjeteve që kanë një vit leje, nuk mund të drejtojnë mjete me më shumë se 1200 kubikë. Duke parë mosha të reja problematike, duhet të shikohet heqja e patentës dhe bllokimi i mjetit”, tha ai pas aksidentit tragjik me tre jetë të rinjsh të humbura.
Një listë me makinat që janë brenda kufijve që përcaktojnë ndryshimet në ligj për drejtuesit e rinj:
Fiat 500 1.0 70 kf Hybrid Connect
Ford Fiesta 1.1 Titanium 75 kf
Renault Twingo 22 kWh Zen
Citroen C3 1.2 PureTech 83 kf
Fiat Panda 1.0 Hybrid 69 kf
Hyundai i20 1.2 MPI 84 kf
Kia Rio 1.2 84 kf
Lancia Ypsilon 1.0 Hybrid 70 kf
Mazda2 1.5 75 kf
Opel Corsa 1.2 75 kf
Renault Clio 1.0 SCe 67 kf
Seat Arona 1.0 EcoTSI 95 kf
Toyota Aygo Connect 1.0 VVTi 72 kf
LEXO EDHE:
Nga heqja e policëve deri te përgjysmimi i gjobave, ja propozimet për ndryshimet në Kodin Rrugor
