Komisioni i Ankimimeve dhe Sanksioneve është tërhequr për vendim lidhur me ankimin e palëve në PD, që kërkojnë regjistrimin në zgjedhjet lokale.
KAS shqyrtoi sot ankimimin që grupi i Enkelejd Alibeajt, i ka bërë vendimit të KQZ, që vendosi që mos të futen në zgjedhje pa plotësuar deklaratën solemne nga kryetari i partisë, që në gjykatë rezulton ende Lulzim Basha.
Në të njëjtën seancë u shqyrtua ankimi nga PD e Sali Berishës, që po ashtu kundërshton vendimin e KQZ-së për mos regjistrimin në lokalet e 14 Majit.
Përfaqësuesi ligjor i grupit Alibeaj, Indrit Sefa ka parashtruar para KAS argumentet ligjorë, përmes së cilave kërkoi rrëzimin e vendimit të KQZ, për mos regjistrimin e tyre në zgjedhje. Sefa u ndal në autorizimin e lënë nga Basha para se të jepte dorëheqjen për regjistrimin e PD-së në zgjedhje. Ai tha ky autorizim iu jep atyre tagër që të bëjnë kërkesën për regjistrim në zgjedhje, ndërsa sa i takon deklaratës solemne thotë se nuk është e detyrueshme që të firmoset nga Lulzim Basha. Sipas tij, kjo është përgjegjësi e subjektit politik.
Përfaqësuesi i PD-së së drejtuar nga Sali Berisha, Ledio Nuraj argumentoi se vendimi i Apelit që rrëzoi Kuvendin e 11 Dhjetorit 2021 dhe vendimet e marra aty, nuk është zbardhur. Në këtë mënyrë, u shpreh ai mbetet në fuqi vendimi i shkallës së parë së dhënë nga Agron Zhukri.
Nuraj u ndal edhe në dokumentet që kanë depozituat grupi i Alibeajt. Ai tha se autorizimi i nënshkruar nga Lulzim Basha nuk ka më vlerë ligjore. Sipas tij, një vërtetim i tillë e ka vlerën deri në tre muaj. Ndërkohë, për deklaratën solemne tha se është kompetencë e kryetarit dhe jo subjektit, për këtë arsye kërkoi që dokumentet e grupit Alibeaj të mos merren në konsideratë.
Argumentet e KQZ
Shqyrtimi i çështjes në ankim erdhi pasi KQZ rrëzoi kërkesat e të dy palëve për tu regjistruar në zgjedhje,
Kryekomisioneri Ilirjan Celibashi tha se PD E drejtuar nga Sali Berisha nuk mund të regjistrohet pasi kryetar i PD-së rezulton ende Lulzim Basha.
Celibashi refuzoi dhe kërkesën e grupit Alibeaj për tu regjistruar në lokalet e ardhshme si Partia Demokratike.
Kryekomisioneri argumentoi se “deklarata solemne” në dokumentat e depozituar në KQZ është firmosur nga personi i deleguar që është Enkelejd Alibeaj dhe jo Lulzim Basha, që sipas Celibashit, rezulton kryetar i PD referuar një vërtetimi gjykate. Dhe kjo, sipas Celibashit është jo ligjore, pasi siç deklaroi, ky akt është “ekskluzivisht i kryetarit të partisë”.
Pas vendimit të KQZ, të dyja palët ushtruan të drejtën e ankimit.
