Shtyhet seanca e planifikuar për dhënien e pretencës ndaj Fatjon Muratit dhe Kristjan Gjinit, lidhur me arsenalin e armëve të gjetur në dy apartamente në kryeqytet, disa muaj më parë.
Shkak i shtyrjes së seancës në Gjykatën e Tiranës u bë mungesa e avokates të Kristjan Gjinit. E radhës u caktua të mbahet në datën 29 mars.
Në seancë u bë e ditur se disa javë më parë, Fatjon Murati kishte kërkuar nga prokurori leje një mujore të dilte në orën 08:00 nga shtëpia dhe të kthehej në orën 20 për arsye shëndetësore, pasi do të kryente disa ekzaminime. Kërkesa kjo që është refuzuar nga gjyqtarja paraprake.
Masakra e Don Boskos
Çështja gjyqësore u risoll në vëmendje pas atentatit të ndodhur të Dielën e kaluar në zonën e Don Boskon në Tiranës. Gjatë mbrëmjes, persona të paidentifikuar qëlluan me breshëri armësh drejt lokalit në pronësi të 32-vjeccarit Murati. Nga të shtënat mbeti e vrarë banakierja e lokalit, 58-vjeçarja Mimoza Paja, ndërsa nga ciflat e xhamit që u përhapën pas të shtënave u plagos mbesa e saj 10-vjeçare, prezente në lokal kur ndodhi ngjarja. Pesë persona të tjerë, mes tyre xhaxhai i 32-vjeçarit mbeten të plagosur nga plumbat.
Ngjarja dyshohet si hakmarrje ndaj Fatjon Muratit. Ky i fundit është pyetur për masakrën e ndodhur në Korrik të vitit të kaluar në Fushë-Krujë, ku u vra Brilant Martinaj – kushëri i Ervis Martinajt, dhe u plagosën dy persona të tjerë, Diklet Vata dhe Besmir Hoxha.
Për hetuesit, kjo ngjarje mund të lidhet me masakrën e Don Boskos.
Arsenali i armëve
I pari që u arrestua lidhur me arsenalin e armëve ishte Kristjan Gjini.
Sipas hetimeve, ai u vu në pranga pas një kontrolli rutinë të policisë në kryeqytet pasditen e 12 Korrikut 2022, që i gjeti në makinë një pistoletë. Kjo çoi më pas efektivët në kontrollin e dy banesave që 26-vjeçari rezultoi se i kishte marrë me qera në kryeqytet. Aty u zbulua arsenali i armëve.
Murati u arrestua në Tetor të vitit të kaluar, teksa u gjet në bordin e një makine të blinduar, bashkë me Indrit Doklen e Gentian Reçi.
Të tre u morrën në pyetje për masakrën e Fushë-Krujës. Dokle e Reçi u laruan më pas, ndërsa Fatjon Murati u mbajt në qeli pasi ndaj tij rezultoi aktiv urdhër-arresti për arsenalin e armëve.
Pas prangosjes, ai u la në qeli nga Gjykata e Tiranës, që dy muaj më vonë zbuti masën e sigurisë nga “arrest me burg” në “arrest shtëpie”.
Sërish në arrati
Referuar vendimit të dytë, gjyqtarja argumentonte se në kushtet kur hetimi nga prokuroria kishte përfunduar, akuza nuk ka gjetur asnjë lidhje mes Fatjon Muratit dhe Kristjan Gjinit. E vetmja provë, argumentonte ajo, ishte gjurma e gishtit në valixhe, që sipas gjyqtares Migena Laska, nuk justifikonte mbajtjen e 32-vjeçarit në qeli.
Kështu u lirua nga qelia Fatjon Murati. Por masën e arrestit shtëpiak e shkeli sërish. Fakti u zbulua natën e 11 Marsit – kur ndodhi vrasja në Don Bosko. Efektivët shkuan në banesën ku duhet të kryente masën e arrestit shtëpiak, për të marrë në pyetje lidhur me ngjarjen. Por, nuk e gjetën aty. Në këto kushte, u shpall sërish në kërkim.
Në një njoftim zyrtar, policia konfirmoi se para kësaj date, verifikimi i fundit për respektimin e masën së sigurisë ishte bërë më 7 Mars. Asokohe, sipas bluve, gjithçka rezultoi në rregull.
Dyshimet, sipas burimeve pranë grupit hetimor, janë se Murati është larguar drejt Prishtinës e më pas ka marrë një fluturim drejt Turqisë nga aeroporti i kryeqytetit të Kosovës.
