Detaje të reja tronditëse kanë dalë në dritë lidhur me arrestimin e një nëne lehonë nga fshati Drisht në Shkodër, që pas denoncimit fillestar që bashkëshorti i saj Naim Bahçja bëri në media.
Ai prej një jave me ndihmën e mbesës së vetë 11-vjeçare po kujdeset për fëmijën e tij të porsalindur, pasi policia ka arrestuar bashkëshorten e tij, Diana Bahçja, vetëm 8 ditë pasi solli në jetë foshnjen e tyre.
Diana Bahçja është arrestuar nga policia e Shkodrës duke e shkëputur nga djali i saj vetëm 8 ditësh pasi gjykata e shkallës së parë në Tiranë i ka vendosur një gjobë në vitin 2020 prej 2 milionë e 500 mijë lekë të vjetër duke ia konvertuar një javë më parë, pra pas tre vitesh me burg një muaj e 20 ditë.
Avokatët e Diana Bahçja kërkuan sot nga gjykata shtyrjen e ekzekutimit të vendimit për dënimin e saj deri kur fëmija të mbushë 1 vjeç. Një prej mbrojtësve ligjorë të nënës lehonë, Anton Kosteri tha për Syri TV se foshnja ka nevojë urgjente për praninë e nënës së tij për ta ushqyer dhe kujdesur për të.
Kosteri theksoi se gjykata duhet të shprehet brenda 5 ditëve për këtë këresë, duke shtuar se dispozita procedurale parashikon lirimin e një personi të dënuar femër kur është shtatzënë ose ka fëmijë të mitur nën 1 vjeç.
“Jemi në këto kushte kur kemi një person që është në arrest në burg, e dënuar dhe kemi një dispozitë procedurale penale që thotë shprehimisht nëse kemi një person të dënuar femër që është shtatzënë ose ka fëmijë të mitur nën moshën 1 vjeç, duhet të lirohet menjëherë dhe të shtyhet afati i ekzekutimit të këtij vendimi. Kemi kërkuar pezullimin e ekzekutimit të vendimit menjëherë, kërkesë e cila duhet të shqyrtohet brenda 5 ditëve nga Gjykata e Tiranës. Kemi bërë një kërkesë ekstremisht të ngutshme për gjykatën dhe shpresojmë që gjykata të shprehet sa më parë”, tha ai.
Ndërkohë, avokatja Xhoi Nela hodhi dritë mbi procedurat që janë ndjekur nga policia gjyqësore për arrestimin e Diana Bahçja.
Nela është shprehur se policia gjyqësore e ka gjetur shtëpinë e të pandehurës kur kishte për të ekzekutuar vendimin e gjykatës, ndërsa kur janë zhvilluar seancat ajo nuk është njoftuar, e si pasojë nuk ka pasur një proçes të drejtë ndaj saj.
“Duhet të sqarojmë një element sepse Kodi i Procedurës Penale nuk lejon arrestimin e nënave që janë me fëmijë në gji. Policia ka bërë ekzekutimin e një vendimi i një forme të prerë që është dhënë më parë. Sa i përket dënimeve me gjobë, ata jepen nga gjykatat për personat që nuk paraqesin rrezikshmëri të lartë shoqërore. Sipas legjislacionit ligji parashikon se dënimet me gjobë kërkojnë miratimin e të pandehurit. Ai pyetet nga gjykata nëse ka mundësi ose jo të paguajë gjobën në të kundërt nëse nuk ka mundësi të jepet një vendim tjetër alternativ.
Rezulton se oficerët e policisë gjyqësore në momentin që janë njohur me vendimin për ta arrestuar ato e kanë gjetur të pandehurën ndërsa kur është bërë gjyqi që të njoftohet dhe të merrte pjesë në proces gjyqësor ata nuk e kanë lajmëruar që është një shkelje e rëndë e të drejtave për një gjykim të drejtë”, shpjegoi ajo.
Sakaq, dramën më të madhe po e përjeton familja Bahçja në Drisht, ku mbesa 11-vjeçare e Naimit e ushqen foshnjën e porsalindur me qumësht lope, në kushtet kur nëna 27-vjeçare duhet të vuajë dënimin me 1 muaj e 20 ditë burg.
Familjarët e foshnjës e kanë të vështirë kujdesin për foshnjën pasi është në një moshë delikate dhe e vetmja gjë me të cilën kanë mundësi ta ushqejnë është qumështi i lopës.
“Për foshnjën kujdeset babai i cili është i privuar nga puna për tu kujdesur për të birin e tij rreth 3 javësh. Jo vetëm babi por është edhe mbesa e familjes 11 vjeçe, e cila ka privuar veten nga shkolla për tu kujdesur për djalin e xhaxhait të saj. Gjithashtu janë dhe 2 pleqtë e familjes dhe një kryefamiljar i cili është i paralizuar dhe është gjatë gjithë kohës në shtrat, po ashtu edhe nëna që është në gjendje shëndetësore jo të mirë. Ditën e djeshme unë e gjeta të lidhur në djep dhe po flinte. Problemi kryesor për foshnjat është ushqimi me gji, ndërsa ai fëmijë është privuar, ushqehet me qumësht lope. Faktikisht nuk është mësuar akoma por familiarët po përpiqen të kujdesen më tepër për ta ushqyer pak nga pak në mënyrë që fëmija të mos ketë deficite”, zbuloi korrespondentja e Syri TV.
