Me një koalicon të quajtur “Bashkë Fitojmë”, Sali Berisha dhe Ilir Meta u regjistruan sot në KQZ si koalicion për zgjedhjet lokale të 14 majit, duke vendosur kandidatët e dalë përmes primareve në PD si alternativë përballlë mazhorancës së drejtuar nga Edi Rama në 61 bashkitë e vendit.
Dy partitë e tjera në koalicionin opozitar Berisha-Meta janë Partia Demokristiane e Nard Ndokës dhe PBDNJ e Vangjel Dules, ndërsa koalicioni do të drejtohet sipas parashikimeve të nenit 65 e vijues të Kodit Zgjedhor nga Partia e Lirisë.
Në këtë koalicion ran ë sy mungesa e partive aleate që historikisht janë rreshtuar në krah të PD, si Partia Republikane e Fatmir Mediut, PDIU e Shpëtim Idrizit apo Partia Agrare Ambientaliste e Agron Dukës.
Për të sqaruar mungesën e PAA-së në koalicion, Duka foli sot në “Open” ku shpjegoi se ka zhvilluar takime me ish-kryeministrin Berisha dhe i ka argumentuar atij se e ka pasur të pamundur të bëjnë koalicion për shkak të kodit zgjedhor, që do ta pengonte subjektin që ai drejton të dilte me lista të vetat për këshillat bashkiakë.
Ai shtoi se është e nevojshme që të jepet një kontribut për fitoren e opozitës, por në këtë mënyrë do rrezikohej mbijetesa e kësaj force politike, ndërsa shtoi se ata do “provojnë veten” me anëtarët e Këshillit Bashkiak.
“Ne kemi bërë takim me Berishën dhe zotin Noka. I kam argumentuar se e kemi të pamundur të bëjmë këtë koalicion për shkak të kodit sepse nuk dalim dot me listat për këshilltarë bashkiakë. Duhet të japim kontribut për fitoren e opozitës, por ne rrezikojmë mbijetesën. Duhet të provojmë veten më anëtarët e këshillit bashkiak por duke mbështetur kandidatët e opozitës. Mendoj se i shërbejmë koalicionit edhe pa firmosur marrëveshje.
Në 2017 u bë marrëveshja Basha-Rama dhe u bë një sakrificë. Në zgjedhjet vendore nuk morëm pjesë për hir të kohezionit me opozitën, në zgjedhjet parlamentare bëmë të njëjtën gjë ku hymë në koalicion. Gjithmonë do ketë diçka të tillë, edhe tashmë është një situatë e rënduar ku mazhoranca ka pushtetin. Gjithkush duhet të japë kontributin për rikthimin e jetës politike në normalitet, mendoj se ne po e bëjmë këtë aty ku kemi peshë. Do ishte më mirë nëse kodi do ishte siç ka qenë, ku të ishim në koalicion dhe të kishim kandidatët tanë për këshillat”, sqaroi Duka.
Sipas kreut të PAA, mbështetja për opozitën do të vijojë edhe pse nuk do ketë një marrëveshje zyrtare, duke mos nxjerrë kandidatë të veçantë dhe duke mbështetur emrat e dalë nga “Primaret”.
“Unë mendoj se ka një frymë pozitive nga opozita, ne kemi deklaruar se s’do kemi kandidatët tanë dhe do mbështesim ata të opozitës. Dalja vetë për këshilltarë bashkiakë ka një merak për të parë peshën që kemi si parti. Në rastin konkret kemi një specifikë, veçanti, PD e Foltores nuk kanë mundësi të regjistrohen në zgjedhje se Kodi i penalizon. Sa më shumë parti të krijojnë këtë lloj strehe, do favorizojnë koalicionin pavarësisht nëse firmosin a jo. Nëse do bënim një koalicion të përgjithshëm që do fusnim një kandidat për këshilltarë bashkiakë do kishte probleme për renditjen. Do ishte më mirë që PD të mos ishte me PL, por me parti të vogla. Por kodi e parashikon që duhet një parti parlamentare”, nënvizoi më tej Duka.
