Situatën e krijuar me kërkesën për regjistrim në zgjedhje të grupit “Alibeaj” me logon e PD që për kryetar ka Lulzim Bashën e dorëhequr, të cilën KQZ e ka rrëzuar dy herë, akademiku Artan Fuga e sheh në një tjetër këndvështrim.
Sipas analizës së profesorit të njohur, grupi i udhëhequr nga Enkelejd Alibeaj mund të mos ketë dashur vetë të ballafaqohet në zgjedhje për shkak se nuk ka një elektorat të fortë dhe ngërçi formal në KQZ mund të shndërrohet në alibi justifikuese për ta.
“Në njëfarë mënyre, ata që kishin menduar se mund t’i jepnin votën grupimit në fjalë, të drejtuar nga Zoti Alibeaj, sigurisht mund të konsiderojmë se s’kanë ku të hedhin votën. Ky është një problem minor, sepse spektri politik nuk i përmbush synimet politike të një kandidati. Unë do doja të kishte një parti që nuk e gjej në spektrin politik. Do e hedh votën.
Mundet, ka shumë mundësi që grupimi i zotit Alibeaj nuk dëshiron të ballafaqohet me zgjedhjet këtë radhë për arsye të shumë faktorëve që bëjnë që të kenë marrëdhënie shumë të vakët me elektoratin. Mund ta skualifikonte në opinionin publik”, tha Fuga për Panorama TV.
Akademiku komentoi edhe ftesën e përsëritur shpesh nga Alibeaj dhe mbështetës së tij si Gazment Bardhi, drejtuar Sali Berishës që kandidatët e “Primareve” t’i regjistrojë me siglën e PD dhe jo në koalicionin që ka krijuar me PL, PBDNJ dhe Partinë Demokristiane të Nard Ndokës.
Sipas Fugës një ftesë për bashkëpunim në kushtet kur pala e “Alibeajt” e ka dërguar në gjyq Berishësn, nuk ka sens logjik në politikë.
“S’mundet dot që Alibeaj të çojë në gjyq pjesën tjetër të partisë për çështjen e vulës dhe të thotë që vula më takon mua, dhe pas vendimit të gjyqit thotë tani hajde bashkohemi. Nuk shkon kjo logjikë.
Për mua ajo që më shqetëson mua nga ana e logjikës politike, se jemi përpara këtyre alogjizma. Pra ne të shkojmë në gjyq për vulën për të përcaktuar se kush e ka atë. Nga e jotja, më pas e marr unë, dhe ai që e fiton thotë tani hajde bashkohemi. Ajo që ka qenë që në origjinë. Në origjinë ka qenë problemi i statusit non-grata të zotit Berisha. Dhe Basha me bazë e përjashtoi nga grupi parlamentar. Më pas kjo mori dimensione të tjera pasi u vendos në pikëpyetje politike Zoti Basha.
Duke u larguar nga Parlamenti në 2019-ën, duke mos hyrë në zgjedhjet e pushtetit lokal i dha pushtetin kryeministrit. Kjo është ndarja e dytë. Një opozitë apo një lëshim ndaj pushtetit. Në planet e tjera ka dhe plane materiale, instrastrukturën e partise”, u shpreh Fuga.
