Pandemia Covid19 po shkon drejt fundit dhe një bilanc për te treguar sesi sistemi shëndetësor i Shqipërisë dhe qeveria e menaxhuan situatën e rënduar në spitale, apo procesin e vaksinimit dhe shpëtimit të jetëve të pacientëve, tregon se ka çeduar në shumë pika.
Pikëpyetja kryesore që ngrihet lidhet me shifrat dhe numrin e personave që humbën jetën në vend.
Organizata Botërore e Shëndetësisë në maj 2022 vlerësoi se afërsisht 12,689 vetë vdiqën në vend gjatë viteve 2020-2021 si rrjedhojë e drejtpërdrejtë ose e tërthortë e COVID-19.
Kjo shifër është 3.9 herë më e lartë se sa statistikat zyrtare të vdekjeve nga COVID-19, pasi shifra përfundimtare e Ministrisë së Shëndetësisë tregon se deri në fund të vitit 2021, të vdekurit nga COVID-19 në Shqipëri ishin 3,217 vetë.
Menaxhimi i pandemisë nga Shqipëria ka ndarë në gjykime edhe profesionistët e shëndetësisë, pasi shefja e Spitalit Infektiv Najada Çomo pretendon se stafet mjekësore kanë bërë mjaftueshëm për t’iu përgjigjur kërkesave të pacientëve, ndërsa mjeku epidemilog Ilir Alimehmeti ngre shqetësimin e fshehjes nga qeveria të numrit të të infektuarve që humbën jetën.
“Në 3 vite u trajtuan më shumë se 12 mijë. Kaluan muaj, ne u mësuam me sëmundjen dhe ju siguroj që stafet mjekësore, 1 3 dhe 4 kanë bërë maksimumin e tyre si nga ana mjekësore dhe ana humane”, u shpreh Najada Çomo.
Teksa të dhënat zyrtare flasin për afro 334 mijë të infektuar dhe 3600 viktima në 3 vite, mjeku Alimehmeti shprehet se numri i jetëve të humbura është 5.4 herë më i lartë sesa pretendon Ministria e Shëndetësisë.
“Kjo nuk është e vërtet, gati të gjithë jemi infektuar, të paktën 1 herë. Raporti i vdekjeve ka qenë 5,4 fish më i lartë se ai që është raportuar, duke çuar deri në 31 dhjetor të 2021 në rreth 17,500 vdekje. Pse ndodhi kjo? Gjithë kush që ka humbur jetën në spitale jo-covidi, në spitale private, jashtë shtetit, në shtëpi e çdo instancë tjetër nuk është brenda këtij kalkulimi”, ka theksuar epidemiologu Ilir Alimehmeti.
Ndërkohë, neurokirurgu Kita Sallabanda nënvizon se “Shqipëria e menaxhoi në mënyrë të rregullt pandeminë”, por ka një vërejtje që është përfshirja e shumë elementëve të politikës në mënyrën si qeveria e trajtoi COVID-19.
Ekspertët janë të ndarë në gjykime edhe kur flasim për vaksinimin, proces i cili nisi në janar të vitit 2021, fillimisht me bluzat e bardha dhe të moshuarit, për tu shtrirë në të gjithë popullatën mbi 16 vjeç.
“Detyruan të bëjnë vaksinë, njerëzit që nuk kishin nevojë, në qoftë se problemin e vuanin të vjetrit, shteti shqiptar detyroi studentët”, tha Alimehmeti për Euroneës.
Ndërkohë, rezulton se mbi 2 milion testime për COVID-19 janë realizuar në 3 vite dhe vetëm 17% e tyre rezultuan pozitiv.
