Ministrja e Jashtme Olta Xhaçka u paraqit ditën e djeshme para prokurorëve në SPAK për t’u pyetur mbi procesin e privatizimit të pronave të Forcave të Armatosura të Shqipërisë dhe më konkretisht bazës detare të “Limonit” në Sarandë.
Kallëzimi që rëndon mbi Xhaçkën është për kohën kur ajo ka drejtuar Ministrinë e Mbrojtjes dhe është dorëzuar në SPAK në mars të vitit 2021 nga ish/zv-komandanti i forcave detare, Artur Meçollari.
Denoncimi nga ana e Meçollarit u bë për dy prona, një në Shëngjin dhe një në Sarandë të cilat sipas tij janë dhënë pa leje i janë dhënë privatit, nga ish-ministrja e Mbrojtjes Olta Xhaçka dhe ish-Shefi i Shtabit të Përgjithshëm, tashmë deputet i Partisë Socialiste Bardhyl Kollçaku,
Sa i përket kallëzimit mbi bazën detare të ushtrisë në gjirin e Limonit, kjo pronë është tashmë në duart e biznesmenëve Shefqet Kastrati dhe Artan Dulaku.
Referuar rastit në fjalë, ish-këshilltari i Presidentit të Republikës, Shemsi Prençi shprehet se me pronat e ushtrisë është bërë një masakër dhe se ato janë vënë në dispozicion të oligarkëve nga Xhaçka, nëpërmjet formulës 1 euro.
Prençi u shpreh se ministrja e Mbrojtjes, Olta Xhaçka duhet të dilte me pranga në duar dje nga SPAK-u dhe të dërgohej në burgun 313, pasi si një pronare e madhe e pronave shetërore, i ka dhuruar ato te oligarkët.
“Si ish-këshilltar i Presidentit të Republikës, jam në dijeni për masakrën që është bërë me pronat e ushtrisë, për t’u vendosur në dispozicion të oligarkëve. Ministrja ashtu do fliste, nuk ka si të flasë ndryshe. Është e vetmja ministre që na ka rezultuar si investitore strategjike, na ka rezultuar si një pronare e madhe që mund të bëjë çfarë të dojë me pronat e ushtrisë”, tha ai.
Sipas Prençit, arroganca dhe përfshirja në korrupsion, ishin arsyet pse Xhaçka u paraqit në SPAK.
“Arroganca e ministres Xhaçka dhe babëzia për t’u pasuruar në një kohë shumë të shkurtër, e ka çuar dje në SPAK. Unë kam menduar që të mos dalë fare nga SPAK-u. Të dilte me pranga në duar dhe të shkonte te 313-ta. Por shteti rezulton i kapur. Se çfarë është bërë me pronat e ushtrisë, janë dhënë në përdorim me formulën 1 euro”, u shpreh Prençi.
LEXO EDHE:
Baza detare e Sarandës “dhuratë” oligarkëve, Olta Xhaçka në SPAK për privatizimin
