Komisioni i Ankimimeve dhe Sanksioneve rrëzoi kërkesën e partisë “Lëvizja Bashkë“ për regjistrimin në zgjedhjet vendore të 14 majit dhe lënien në fuqi të vendimit të Komisionerit Shtetëror të Zgjedhjeve.
Partia “Lëvizja Bashkë” me kryetar Arlind Qorrin ka depozituar në KQZ shkurtim vendimin e lëshuar nga Gjykata e Rrethit Gjyqësor Tiranë, me të cilin vërtëton regjistrimin e saj në Gjykatë. Në përmbajtje të dispozitivit, gjykata shprehet se ndaj këtij vendimi mund të bëhet ankim në Gjykatën e Apelit, afat ky që fillon nga e nësërmja e shpalljes së tij.
Sipas kryekomisionerit, nga përmbajtja e dispozitivit del qartë se ky vendim nuk është i formës së prerë e si rrejdhojë nuk është i pasqyruar në regjistrin e partive politike të Gjykates së Rrethit Gjyqësor Tiranë.
Në këto kushte, sipas KQZ, del se partia “Lëvizja Bashkë” nuk e ka përmbushur detyrimin ligjor për tu regjistruar si subjekt zgjedhor në zgjedhjet e 14 maj 2023.
Për këto arsye Komisioneri Ilirjan Celibashi vendosi të mos e regjistrojë si subjekt për zgjedhjet e 14 majit.
Vendimi u ankimua nga Partia “Lëvizja Bashkë” në KAS, që sot la në fuqi vendimin e Celibashit.
“KAS pasi diskutoi çështjen në tërësi me shumicë votash vendosi rrëzimin e ankimit të partisë “Lëvizja Bashkë“ dhe lënien në fuqi të vendimit të Komisionerit Shtetërore të Zgjedhjeve”, u shpreh relatori i çështjes në KAS, Elvis Cefta.
Sipas Ceftës, kundër këtij vendimit lejohet ankim në kolegjin zgjedhor pranë Gjykatës Administrative të Apelit në Tiranë.
Drejtuesi i “Lëvizja Bashkë” Arlind Qorri tha se vendimi do të ankimohet, ndërsa paralajmëroi se do të vijojë edhe me mbledhjen e formave për të kandiduar si i pavarur për Bashkinë e Tiranës, së zgjedhjet e ardhshme lokale.
“Për ne ditë feste, do jemi kudo. Do thyejmë rekordin me mbledhjen e firmave. Nuk më pengon askush të kandidoj i pavarur”, tha Qorri në një komunikim për gazetarët.
