U denoncua nga Fiksi, arrestohet 57 vjeçari që shiti 1 milionë lekë kallashnikovin në Durrës
Vetëm pak minuta pasi emisioni investigative “Fiks Fare” publikoi një material video dhe audio për të treguar se sa e lehtë është për të blerë një armë në Shqipëri, policia në Durrës ka arrestuar 57-vjeçarin që bëri “pazar” me gazetaren në ditën për diell.
Bashkëpunëtorja e emisionit investigative arriti të blejë një automatic, që iu shit nga shitësi i prezantuar si Marin Prenga, përkundrejt 1 milion lekëve.
Prenga dëgjohet të thotë se arma është në gjendje shumë të mirë, dhe se më parë ka shitur edhe dinamit e pistoleta, por tashmë ka frikë dhe sipas tij çmimi për të blerë një pistoletë ka shkuar në 1 milionë e gjysmë lekë.
E teksa gazetarët e “Fiksit” e kanë dorëzuar armën në Komisariatin e Policisë Durrës kundrejt të gjitha procedurave ligjore, efektivët kanë bërë të mundur arrestimin e 57-vjeçarit.
“57 vjeçari i cili i shiti një shtetasjeje një armë zjarri kallashnikov, të cilën e mbante pa leje, është arrestuar mbrëmjen e sotme nga Policia e Durrësit. Arrestimi i shtetasit M. N., 57 vjeç u bë menjeherë pas denoncimit në emisionin investigativ “Fiks Fare”. Uniformat blu sekuestruan armën e zjarrit dhe municionin luftarak që zotëronte 57 vjeçari”, thuhet në njoftimin e uniformave blu.
Njoftimi i policisë:
I shiti një shtetaseje, një armë zjarri kallashnikov, të cilën e mbante pa leje, vihet në pranga 57-vjeçari dhe sekuestrohet arma e zjarrit.
Specialistët për Hetimin e Trafiqeve të Paligjshme të DVP Durrës, menjëherë pas denoncimit të bërë nga gazetarët e emisionit investigativ “Fiks Fare”, arrestuan shtetasin M. N., 57 vjeç, banues në Shënavlash, Durrës.
Arma e zjarrit dhe municioni luftarak u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme, për veprat penale “Mbajtje pa leje dhe prodhimi i armëve, i armëve shpërthyese dhe municionit” dhe “Trafikimi i armëve dhe municionit”.
Drejtoria Vendore e Policisë Durrës falënderon gazetarët e emisionit “Fiks Fare” për bashkëpunimin dhe i fton qytetarët e mediat që të denoncojnë çdo rast paligjshmërie në numrin 112, duke iu garantuar reagim të menjëhershëm.
