Dy muaj na ndajnë nga zgjedhjet lokale të 14 Majit dhe kryeministri Edi Rama duket se ka nisur një sërë lëvizjesh, kryesisht të karakterit ekonomiko-financiar për të zbutur qëndrimin e opinionit publik mbi mënyrën si ai ka qeverisur vendin.
Për të ndalur indinjatën që mund të kthehet në votë kundër kandidatëve të tij në zgjedhje, Rama ka njoftuar prej pak kohësh rritjen e pragut të pagës minimale në 400 mijë lekë të vjetra.
Edhe pse ky vendim sipas ekspertëve mund të rëndojë xhepat e familjeve shqiptare, duke marrë në konsideratë kurbën e inflacionit që njeh rritje për çdo muaj, qeveria pritet që ta miratojë dhe të nisë zbatimin në muajin prill.
Por Rama nuk është ndalur me kaq, pasi sot deklaroi se qeveria do të miratojë edhe një paketë ligjore në mënyrë që të punësuarit me paga deri në 50 mijë lekë, të mos paguajnë asnjë taksë.
“Sot kemi vendosur që në fund të prillit paga minimale të jetë 40 mijë lekë të reja, ndërkohë që të tjerët premtonin që deri në fund të 2025 të ishte 38 mijë lekë. Për kompanitë që rëndohen nga kjo rritje që është e kombinuar me sigurimet shoqërore dhe shëndetësore ne do të paguajmë drejtpërdrejtë nga buxheti të atyre që marrin pagë minimale. Kemi vendosur që në vitin 2025 paga minimale të jetë 45 mijë lekë. Në javët dhe muajt në vijim do të kemi në rritje të përgjithshme për të garantuar që për pagat deri në 500 mijë lekë (të vjetra) të mos ketë asnjë taksë. Kjo do të thotë që paga që do të shkojë në arkën e familjes do të jetë më e lartë sesa ajo që shkon sot me taksën”, tha Rama.
Sipas tij qeveria po përgatit një tjetër plan për një rritje të pagave në disa zëra kyç, ndërsa duhet të jetë sipërmarrja private duhet të bëjë një reflektim pa humbur kohë.”
Duke thënë se “ nuk hyjmë dot në konkurrencë me Gjermaninë kur vjen puna tek shpërblimi i fundit të muajit”, Rama nënvizoi se të gjithë aktorët ekonomikë përfshirë edhe qeverinë si ndihmës dhe hartues të politikave, duhet të garantojnë që gjithë njerëzit të marrin atë që është maksimumi i mundshëm i këtij Shqipërisë, për të mos menduar emigrimin si opsion.
“Problemi që kishte vende pune dhe s’ka profesionistë, sot rrezikon të jetë që s’ka punëtorë, aq më tepër kur bota, po marr shembullin e Gjermanisë, po hynë në një fazë krize pikërisht për punëtorë edhe ajo vetë. Përfytyroni që para çfarë presioni mund të gjendet Shqipëria në një këtë periudhë kohe, prandaj të gjithë dihet të vrapojmë më shumë. Tani është koha të bëjmë të pamundurën si shumicë qeverisëse ndërsa sipërmarrja duhet të bëjë gjithçka që mundet sot, rritja e pagave të jetë në mënyrë uniforme. Ne e hodhëm hapin e parë që ishte një hap që nuk mund të parashikonim më parë, përtej programit tonë elektoral për pagën minimale”, u shpreh Rama.
Shefi i qeverisë gjithashtu i “tërhoqi veshin” sipërmarrësve privatë, duke thënë se nuk mund të vazhdojnë t’i paguajnë punonjësit më pak se produktiviteti i tyre, apo t’ua kalojë një pjesë të pagës në dorë e një pjesë në bankë.
“Sipërmarrja private duke shtrënguar dorën dhe duke lënë të fundit ato që duhet të jenë të parat. Pagat, i ka hapur vetes një gropë që nëse nuk nxitojmë sot do bëhet e pambyllshme. Një gropë e cila vjen si rezultat i humbjes së kapitalit njerëzor. Sipërmarrja nuk mund të vazhdojë të nën paguajë të punësuarit në raport me atë që është produktiviteti i vetë. Sipërmarrja private duhet të bëjë gjithçka për punonjësit e tyre. Ajo që ka filluar të ndihet sot është vetëm alarmi i fundit; humbja e burimeve njerëzore”, tha kryeministri Edi Rama.
