Kryetari i PD-së, Sali Berisha duket se nuk shpreson për një vendim të KQZ-së për regjistrimin e Partisë Demokratike të drejtuar prej tij, në zgjedhjet lokale të 14 Majit.
Berisha, në një deklaratë për mediat këtë të Hënë, tha se PD do të hyjë në zgjedhje si koalicion me PL. Ai kujtoi se Partia e Lirisë është angazhuar të mbështesë kandidatët e Partisë Demokratikë në të gjithë Shqipërinë.
Për ditën e nesërme, paralajmëroi zhvillime të reja.
“Ka një vendim të Këshillit Kombëtar të PD. PD hyn në këto zgjedhje në koalicion. Ka një koalicion me Ilir Metën, të parin fare, sipas të cilit, Partia e Lirisë angazhohet të mbështesë kandidatët tanë në të gjithë Shqipërinë. Ky koalicion do njohë zhvillime të tjera të reja dhe do komunikohen nesër zhvillimet e reja të këtij koalicioni. Ne jemi të bindur se koalicioni është tmerri i Edi Ramës. Edi Rama është i tmerruar nga këto zgjedhje. Ai urdhëroi gjykatës të pamoral, pa ndërgjegje profesionale dhe njerëzore, të shkelmojnë ligjet. Ai, me pengjet e tij, po degradon çdo institucion të këtij shteti”, tha Berisha.
“Dy gjëra dua t’u them: Njohja e Alibashës me autorizimin e një të dorëhequri, ekziston në një formë të ngjashme vetëm te Shpirtrat e Vdekur të Çiçikovit. Si episod! Nuk ka në historinë e btoës një autorizim të vlefshëm. Këto janë testamente të njerëzve pa moral, të pengjeve që shfrytëzohen në mënyrën më të turpshme. Së dyti, nuk ekziston në asnjë ligj dhe Kushtetutë, që zyrtari që jep dorëheqjen, duhet të regjistrojë dorëheqjen në gjykatë. Këtu tejkalohet. Askush asnjëherë në këtë vend nuk ka vënë kurrë në dyshim deklaratën e dorëheqjes. Siç bën Edi Rama me Lulzim Bashën”, shtoi ai.
“Këto vijnë nga tmerri që ai ka nga vota e lirë. Ai e ndjen se është i humbur, ai e ndjen se ka shpërthyer një urrejtje popullore ndaj tij, që nuk ka të krahasuar, përveç urrejtjes ndaj Enver Hoxhës”, theksoi Berisha.
Ndërkohë, çështja e regjistrimit të Partisë Demokratike në KQZ për zgjedhjet lokale të 14 Majit nijon të mbetet pa përgjigje. Gjatë seancës së sotme paraprake, Komisioni i Ankimeve dhe Sanksioneve vendosi të mos pranojë ankimimet e grupimit Alibeaj dhe PD së drejtuar nga Sali Berisha për regjistrimin e Partisë Demokratike në Zgjedhjet e 14 majit, duke e rikthyer çështjen sërish te kryekomisioneri Ilirja Celibashi.
Berisha: Rama dhe Kim, të dy me mekanizmin McGonigal, do të dështojnë siç dështoi ai
Berisha akuzoi kryeministrin Edi Rama dhe ambasadoren amerikane Yuri Kim për ndikim në procesin gjyqësor për vulën e PD, me qëllim që sipas tij, Partia Demokratike të mos regjistrohej në KQZ për zgjedhjet e ardhshme lokale.
“Pikërisht për të lënë PD-në jashtë zgjedhjeve, Rama bllokoi procesin zgjedhor deri 3 ditë para afatit të regjistrimit. Pikërisht për një gjë të tillë, dorëzoi me Elira Kokonën, shkresën që lexuan gjykatësit. Pikërisht sepse ka lepurin në bark, kombinoi me McGonigalin me fustan, e cila në shkelje të të gjitha parimeve të vendit të saj dhe këtij vendi, u angazhuan në mënyrën më korruptive kundër Partisë Demokratike”, tha Berisha.
“Rama dhe Kim, të dy me mekanizmin McGonigal”, theksoi, “do të dështojnë siç dështoi ai”.
“I bëj thirrje edhe njëherë, inspektorit të përgjithshëm të DASH, i bëj thirrje FBI-së, i bëj thirrje Kongresit të SHBA, për një hetim të plotë për të gjitha këto veprime antiligjore, antikushtetuese, që shkelmojnë konventat ndërkombëtare të ambasadores Kim. Sikundër e garantoj Edi Ramën se asgjë nuk mund ta shpëtojë atë pa pasur fatin e McGonigal, jo në Amerikë, por në Shqipëri”, tha më tej.
Zhvillimet në Kosovë
Gjatë fjalës së tij, Berisha u ndal dhe te zhvillimet në Kosovë. Ai tha se Presidenti serb Aleksandër Vuçiç është një ultranacionalist i verbër, i cili nuk lejon asociacionin e komunave shqiptare nga njëra anë, ndërkohë që kërkon asociacion me komuna serbe në Kosovë.
“Dënoj qëndrimin e tij. Dënoj gjithashtu deklaratat se në kuadrin e tij në rajonet e Serbisë, do vizitojë Kosovën. Këto janë deklarata që rrisin tensionet në rajon. Të gjitha këto deklarata bëhen në prag të një ngjarje shumë të rëndësishme, datës 18 mars, takimit që zhvillohet në Ohër për firmosjen e planit franko-gjerman, i cili ka marrë mbështetjen më të gjerë ndërkombëtare, por edhe rajonale. Të cilin kryeministri i Kosovës e ka miratuar plotësisht, por nuk e ka firmosur presidenti i serbomadhisë dhe tani nxjerr teori pas teorie. Kërkon duke i mohuar një etnie në vendin e tij të drejtën për asociacion. I bëj thirrje komunitetit ndërkombëtar të qëndrojë fort ndaj këtij autokrati serbomadh. Mbështes krijimin e asociacionit në përputhje me Kushtetutën e Kosovës”, shtoi Berisha.
Më tej, tha se me politikat e tij, Vuçiç është gjeneratori kryesor i tensioneve në rajon.
