Vijon të mbetet pa përgjigje çështja e regjistrimit të Partisë Demokratike në KQZ për zgjedhjet lokale të 14 Maji.
Gjatë seancës së sotme paraprake, Komisioni i Ankimeve dhe Sanksioneve vendosi të mos pranojë ankimimet e grupimit Alibeaj dhe PD së drejtuar nga Sali Berisha për regjistrimin e Partisë Demokratike në Zgjedhjet e 14 majit.
Për ankimin nga PD e drejtuar nga Berisha, KAS konstatoi se “ankuesi nuk legjitimohet sepse nuk ka interes të ligjshëm në një çeshtje që i përket një kërkuesi tjeter dhe KAS-i nuk ka kompetence për shqyrtimin e ankesës, pasi KSHZ nuk është shprehur me vendim përfundimtar për kërkesen e ankuesit”.
Lidhur me ankimin e grupit Alibeaj, KAS njoftoi se për çështjen duhet që fillimisht të shprehet Celibashi.
“Vendimi i Komisionerit nr. 158, datë 09.03.2023 është vendim i ndërmjetëm. Ai nuk i ka dhënë zgjidhje në themel kërkesës me nr. 1337 Prot., datë 06.03.2023. Komisioneri e ka detyrim ligjor që të shprehet me vendim për pranimin ose rrëzimin e saj. KAS-i është instancë e ankimit administrativ dhe jo instancë e shqyrtimit fillestar të kërkesave. KAS-i nuk mund të ushtrojë kompetenca, të cilat nuk i janë ngarkuar shprehimisht nga ligji. Kjo do të thotë se ai nuk mund të shprehet për themelin e kërkesave, pa u shprehur më parë Komisioneri si organ kompetent për shqyrtimin dhe zgjidhjen e tyre. KAS-i nuk ka kompetencë “për urdhërimin e regjistrimit si subjekt zgjedhor të “Partisë Demokratike të Shqipërisë”” si instancë fillestare, sikurse i kërkohet nga ankuesi”, njofton KAS.
Në mbledhjen e zhvilluar në 9 mars, gjatë shqyrtimit të kërkesave të PD-së së drejtuar nga Sali Berisha dhe të grupit Alibeajt për t’u regjistruar në zgjedhje, KQZ vendosi të mos i pranojë të dyja. Kërkesa e PD-së së drejtuar nga Berisha nuk u pranua për shkak se sipas kryekomisionerit Celibashi, Basha njihet ligjërisht si kryetar partie.
Ndërsa lidhur me kërkesën e Alibeajt për regjistrimin e PD-së në zgjedhje, Ilirjan Celibashi u shpreh se nuk e pranonte për shkak se mungonte një “deklaratë me shkrim e nënshkruar nga kryetari i partisë politike”, që sipas tij është Lulzim Basha dhe e ktheu dokumentacionin për plotësim.
Vendimi u ankimua nga të dyja grupet.
Më herët, pranoi sot kërkesën e grupit Alibeaj për miratimin e listave të anëtarëve të KZAZ, ndonëse të dy palët brenda selisë blu depozituan listat me anëtarë.
