Kryeministri Edi Rama e ka bërë fakt të kryer këtë të shtunë largimin e Artan Lames nga detyra si kreu i Agjencisë Shtetërore të Kadastrës, me një dalje për mediat ku në krah të tij ka prezantuar Dallëndyshe Bicin si drejtuesen e re të institucionit.
Me lavdeve të Lames, që sipas zërave do të bëhet pjesë e ekipit të socialistëve për Lokalet 2023, me Ramën që pritet t’i besojë një bashki të rëndësishme në jug të vendit, kreu i ekzekutivit kërkoi që “dora e hekurt” e Dallëndyshes të godasë siç bënin rruspat e saj nën drejtimin e IKMT-së.
Teksa përcillte Lamen, Rama iu drejtua Bicit duke kërkuar që të prihen bishtat e këqinj që sipas tij kanë ndikuar në efektivitetin e punës së “Kadastrës”.
Rama shkoi edhe më tej duke përmendur SPAK-un, teksa tha se duhet bashkëpunuar me Prokurorinë e Posaçme për t’iu treguar vendin këtyre bishtave brenda institucionit.
“Sot kemi një bazë nga e cila mund të shkojmë me shpejtësi më tutje. Në këtë fazë na duhen hapa të shpejtë, është koha të mbyllim rrugët e kontakteve të drejtëpërdrejta. Kadastra është banka më e rëndësishme e vendit, është banka e pasurive të paluajtshme, kërkon që të sillet dhe funksionojë si e tillë. Duhet të merren masa serioze në lidhje me bishtat e së keqes në institucion, detyra e drejtores së re është që të cojë aty ku e kanë vendin ata që kanë luajtur bishtin e institucionit për interesat e tyre. Duhet bashkëpunim me Prokurorinë Speciale”, tha kryeministri.
Mesazhin që Rama i dha pasaardhëses së tij në detyrë, e ripërsëriti edhe Lame, teksa në fjalën e tij kërkoi nga drejtuesja e re që të ndjejë syrin kritik të shefit të qeverisë dhe të veprojë ndaj atyre që e shohin veten si të pavarur brenda “Kadastrës”.
“Unë nuk e kam vuajtur prezencën e tij, impostimin e tij në vendimarrjet e mia. Kam dëgjuar, më kanë dëgjuar edhe kemi debatuar, kur gjërat janë vendosur kam qënë i lirë në vendimarrjet e mia. E falenderoj se nuk kam gjetur një situatë kaq komode. Kam qënë i lirë në këtë pikëpamje, por kjo misinterferencë e Ramës ka pasur një të keqe të vogël, sot mund ta kritikoj kryeministrin se nuk më heq nga detyra… e keqja ka qënë se besimi i tij total, një pjesë e stafeve të mos ndjejë se ka një sy nga lart, janë ndjerë si të pavarur e jo si një pjesë e tërë. I kërkoj që drejtori i ri ta ndjejë këtë sy, e jo vetëm ai por edhe stafet. Çdo njeri duhet ta ndjejë syrin e kryeministrit, kur ta shtypë një tast ta dredhë mirë gishtin që ta dijë se çfarë ka pas”, u shpreh Lame.
