Akset rrugore kombëtare, urbane dhe ato rurale, në Shqipëri po bëhen gjithnjë e më pak të sigurta nga viti në vit, ndërsa përdoruesit e rrugëve në shumicën e aksidenteve kanë treguar papërgjegjshmëri në drejtimin e mjeteve, duke shkaktuar viktima të pafajshme.
Numri i aksidenteve në vend u rrit ndjeshëm vitin e kaluar dhe rrugët e vendit vijojnë të përgjaken me një ritëm të frikshëm.
Kështu, pa mbushur ende 24 orë nga aksidenti i rëndë me tre të rinj që mbetën viktima në mbikalimin e Saukut, tre aksidente të tjera me vdekje u regjistruan paraditen e së premtes në vend. Orët e pasdites, një tjetër përplasje rezultoi fatale për jetën e një 39-vjeçari.
Gjashtë viktima dhe tre të plagosur është bilanci tragjik i këtyre katër aksidenteve.
Aksidenti i parë ishte ai që u regjistrua pas orës 17:30 të pasdites së djeshme, ku në rreth-rrotullimin pranë qendrës tregtare TEG, automjeti tip “Audi A8” me drejtues Klevis Ruçaj, që ishte duke udhëtuar në unazën lindore me drejtim lëvizje nga Farka, fluturoi duke përfunduar i shkatërruar në nënkalimin e autostradës Tiranë-Elbasan.
Në aksident ndërruan jetë në vendngjarje dy vajzat pasagjere, të identifikuara si Sikela Përroj (23 vjeçe) dhe Erisilda Abedini (22 vjeçe), ndërsa shoferi 19-vjeçar humbi jetën pasi u transportua në spitalin e Traumës.
Mjeti tip Audi me targa “AB008 MJ” që i riu drejtonte po udhëtonte me shpejtësi skëterrë (mbi 200 km/orë) dhe në tentativë për të hyrë në rrethrrotullim ka humbur drejtimin, duke goditur barrierën anësore duke e kalur tej për tej, për të përfunduar mbi kofanon e një mjeti “Honda”, duke bërë që të plagosen Alda Kurti (51 vjeçe), O.K. (24 vjeç) e Qemal Kurti, rreth 60 vjeç (drejtues i automjetit), të cilët udhëtonin në drejtim të Elbasanit.
Aksidenti i dytë tragjik ndodhi rreth orës 12:15 në lagjen nr. 18 të Durrësit, në afërsi të spitalit të qytetit.
Një betoniere përplasi për vdekje një person që lëvizte me biçikletë.
Policia shoqëroi në komisariat drejtuesin e betonieres, Petrit Pasha, 58-vjeç, i cili besohet se drejtonte mjetin në gjendje të dehur dhe ka përplasur për vdekje drejtuesin e biçikletës mbi vijat e bardha.
Ndërkohë pamjet e aksidentit ishin tronditëse, pasi goma e mjetit të tonazhit të rëndë ka zënë nën vete viktimën, duke e dëmtuar rëndë në pjesën e kokës.
“Rreth orës 12:15, në lagjen nr. 18, Durrës, një automjet (betionere) me drejtues shtetasin P. P., 58 vjeç, ka përplasur një shtetas ende të paidentifikuar që lëvizte me biçikletë, i cili si pasojë e përplasjes, ka humbur jetën. Shtetasi P. P. është shoqëruar në Komisariat, për kryerjen e veprimeve të mëtejshme procedurale. Grupi hetimor ndodhet në vendngjarje dhe po punon për sqarimin e rrethanave të këtij aksidenti”, njoftoi policia.
Viktima u identifikua më pas si Neshit Lufta, 71 vjeç.
Aksidenti i tretë – Kur kishte kaluar pak më shumë se një orë nga përplasja fatale në Durrës, një tjetër aksident me pasojë vdekjen u regjistrua në rrugën e varrezave, në Kavajë.
Një automjet tip “Golf” me targa AA 045 SJ që drejtohej nga 30-vjeçarja Rovena Cara ka rënë në kanal dhe për pasojë shoferja ka humbur jetën.
“Më datë 10.03.2023, në vendin e quajtur Përroi i Rikaj, Kavajë, shtetasja R. C., 30 vjeçe, duke drejtuar automjetin e saj, dyshohet se ka humbur kontrollin mbi drejtimin e mjetit dhe ka dalë nga rruga. Si pasojë e aksidentit 30-vjeçarja ka ndërruar jetë në vendngjarje”, njoftoi policia.
Aksidenti i katërt – Olger Zhuti, 39 vjeç, banues në Korçë, është personi i cili humbi jetën pasditen e sotme nga një aksident në aksin Korçë-Pogradec.
Ai ishte duke ecur në këmbë, kur u përplas nga një automjet. Sipas bluve, Zhuti humbi jetën gjatë transportimit për në spital.
“Rreth orës 18:58, në aksin rrugor ‘Korçë-Pogradec’, në afërsi të fshatit Lumalas, Korçë, një automjet ka aksidentuar një këmbësor rreth i cili për pasojë ka ndërruar jetë gjatë rrugës për në spitalin e Korçës”, njoftoi policia. Drejtuesi i automjetit është larguar nga vendi i ngjarjes, ndërsa një hetim ka nisur për identifikimin e tij dhe zbardhjen e rrethanave të ngjarjes.
Më vonë gjatë pasdites, një tjetër person mbeti i lënduar nga një aksident i ndodhur në Fier. I plagosuri është një 60-vjeçari i cili ishte duke lëvizur me biçikletë kur u përplas nga një automjet.
Ndërsa në Tiranë, një makinë përfundoi e përmbysur në rrugën ‘Llazar Shapatini’. Drejtuesi dyshohet se ka humbur kontrollin mbi drejtimin e tij dhe automjeti ka dalë nga rruga, njoftoi policia. Fatmirësisht këtë herë, përveç dëmeve materiale, shoferi mbeti i palënduar.
LEXO EDHE:
Aksidenti me 3 viktima/ Audi mbi 200 km/orë, një nga vajzat studente e gazetarisë
EMRI/ Përfundoi në kanal dhe vdiq, detaje nga aksidenti në Kavajë
