Detaje të reja kanë dalë në dritë për aksidentin tragjik që ndodhi pasditen e djeshme në rreth-rrotullimin pranë qendrës tregtare TEG, ku automjeti “Audi A8” me drejtues 20-vjeçarin Klevis Ruçaj, që ishte duke udhëtuar në unazën lindore me drejtim lëvizje nga Farka, fluturoi duke përfunduar i shkatërruar në nënkalimin e autostradës Tiranë-Elbasan.
Në aksident ndërruan jetë në vendngjarje dy vajzat pasagjere, të identifikuara si Sikela Përroj (23 vjeçe) dhe Erisilda Abedini (22 vjeçe), ndërsa drejtuesi humbi jetën pasi u transportua në spitalin e Traumës.
Sa i përket dy vajzave, mësohet se 23-vjeçarja Sikela Përroj jetonte e vetme në Tiranë, pasi familja e saj jeton jashtë vendit. Ajo është nga Shalësi i Cërrikut dhe sapo kishte përfunduar studimet e larta në degën e Gazetarisë, në Tiranë.
Ndërkohë, Klevis Ruçaj mësohet se është banues në Fier, ku edhe do të përcillet sot për në banesën e fundit, në orën 16:00. Ai ishte pajisur me leje drejtimi në vitin 2021, pra në moshën 18-vjeçare dhe kishte marrë disa herë masa administrative nga policia për tejkalim shpejtësie (edhe në zona të banuara), parakalime të gabuara apo përdorim celulari në timon.
Mjeti tip Audi me targa “AB008 MJ” që i riu drejtonte po udhëtonte me shpejtësi skëterrë dhe në tentativë për të hyrë në rrethrrotullim ka humbur drejtimin, duke goditur barrierën anësore duke e kalur tej për tej, për të përfunduar në nënkalim.
Boldnews.al ka siguruar edhe videon e momentit kur Klevis Ruçaj humbet kontrollin e mjetit “Audi”, duke shkaktuar aksidentin ku ai dhe dy vajzat mbetën të vdekur.
Në pamjet e kamerave të sigurisë, duket qartë që mjeti po lëviz nga Farka në drejtim të rrethrrotullimit me një shpejtësi marramendëse, dhe vetëm për pak nuk ka marrë para një automjet tip “Benz” që del nga rrethrrotullimi për të hyrë në autostradë.
Mjeti në fjalë ka mundur t’i shmangej përplasjes para se “Audi” të fluturonte për të çarë barrierat mbrojtëse për të rënë më pas mbi kofanon e mjetit “Honda”, duke bërë që të plagosen Alda Kurti (51 vjeçe), O.K. (24 vjeç) e Qemal Kurti, rreth 60 vjeç (drejtues i automjetit), të cilët udhëtonin në drejtim të Elbasanit.
“Audi” fluturoi për disa metra në ajër dhe pasi ra mbi mjetin “Honda”, goditi më pas bordurën që ndanë dy karrexhatat me senset të aksit Tiranë-Elbasan.
Nga matjet që ekspertët e Policisë Rrugore kanë kryer në terren rezulton se “Audi” udhëtonte me një shpejtësi mbi 200 km/orë dhe shenjat e para të frenimit i ka pasur vetëm 27 metra larg rrotullimit duke mos pasur asnjë mundësi për shmangien e këtij aksidenti të rëndë.
Kjo zonë edhe më herët ka pasur problem për sa i përket aksidenteve me pasoja kryesisht të mjeteve që udhëtonin nga Elbasani në Tiranë. Këto aksidente sollën edhe nevojën për të rindërtuar rrugën duke krijuar këtë rreth-rrotullim që sërish nuk i shmangu aksidentet.
