Aksidenti tragjik me tre viktima dhe tre të plagosur në mbikalimin e Saukut, ku “Audi A8” i 20-vjeçarit Klevis Ruçaj thuajse fluturoi drejt rrethrrotullimit dhe përfundoi në nënkalim mbi kofanon e një mjetit tjetër, u duk sikur nisi një fushatë sensibilizimi në rrjetet sociale me hashtagun “shpejtësia vret”.
Por as kjo fushatë dhe as 4 jetë të tjera të humbura në Kavajë, Durrës apo Dibër, që e pasuan këtë aksident tragjik, duket se nuk e kanë ndalur vrullin e të rinjve shqiptarë për të lëvizur me shpejtësi marramendëse në rrugët e vendit.
Numri i lartë i aksidenteve tragjike duket se nuk ka mundur të shërbejë si këmbanë alarmi, ndërsa të rinjtë shqiptarë vijojnë të rrezikojnë jetët e tyre, por edhe të përdoruesve të tjerë të rrugës.
Sikur të mos mjaftonin aksidentet, videot ku promovohet tejkalimi i shpejtësisë dhe ku manovrat e gabuara në rrugë, janë shndërruar në trend në rrjetet sociale, kryesisht “Tik Tok” dhe “Instagram”, ku të rinjtë synojnë të gjenerojnë pëqlime dhe reagime.
View this post on Instagram
E teksa ende nuk ka kaluar një javë nga aksidenti pranë TEG, ku humbën jetë Klevis Ruçaj, Erisilda Abedini dhe Sikela Përroj, dy personazhe të njohur në rrjetin social “Tik Tok” kanë prodhuar një tjetër skenë të frikshme në rrugë.
Aleks Visha dhe reperi problematik Kleviol Ahmeti shfaqen duke lëvizur me shpejtësi skëterrë në tunelin e Kalimashit, me një automjet “Ferrari” që shihet teksa arrin shpejtësinë 307 km/h.
Në videon që filmohet nga Ahmeti, ata tregojnë videon për ndjekësit e tyre shpejtësinë e frikshme me të cilën po lëvizin në tunel, në drejtim të qytetit të Kukësit, dhe në një moment rrezikojnë të përplasen me një makinë tip “Mercedes Benz” që ndodhet përpara tyre.
“Aleks na vrave, të kam vëlla. Bravo Aleks, bravo”, dëgjohet t’i thotë reperi nga Lushnja, mikut të tij që drejton mjetin dhe pas frenimit, shmang një aksident që mund të kishte rezultuar fatal me atë shpejtësi.
Edhe pse çdo ditë aksidentet po marrin jetë njerezish, shqiptarët me sa duket e kanë të vështirë të ndërgjegjësohen dhe të rinjtë kanë kthyer në sfidë publikimin e videove ku thyejnë rregullat e qarkullimit rrugor me synim marrjen e klikimeve.
