Nënkryetari i Dhomës së Përmbaruesve Gjyqësorë Privatë, Besmir Kodra, shprehet se shërbimi përmbarimor privat është më efikas në raport me atë shtetëror.
Në emisionin “Mcn Economy”, Kodra deklaroi: “Nga ana e privatit s’mund ta kemi të saktë shifrën. Por është më e madhe sa i takon shërbimit përmbarimor privat. E padiskutueshme që është më efikas. Efektshmëria, interesi që ka përmbaruesi gjyqësor privat për ta ekzekutuar sa më shpejtë dosjen, sepse do marrë edhe tarifën përkatëse që i takon. Çdo ditë e më shumë të qëndrojë dosja, është kosto për zyrën përmbarimore. Pa përmbarimin, drejtësia e vonuar është drejtësia e mohuar. Pa ekzekutimin e vendimit të gjykatës, s’mund ta konsiderojmë një drejtësi të dhënë”.
Po ashtu, përmendi 4 shërbime të reja që pritet që të ofrohen me ligjin e ri.
“Janë katër shërbime të reja për të cilat ligjvënësi i ka parashikuar që në 2019, në ligjin e ri në kuadër të reformës në drejtësi, që i kryejnë përmbaruesit privatë në disa vende të BE. Shërbimi i parë është ankandi. Një nga shërbime shtesë është akti i konstatimit. Pavarësisht se s’ka filluar të aplikohet, jam i sigurt që do gjejë vend dhe do krijojë lehtësira shumë për subjektet. Nëse subjekteve u ndodhte një fatkeqësi natyrore apo marrëdhënie kontraktuale, që duhet
të provonin, mbetej vetëm në verbalitet, por s’gjenin provën e faktit. Nëse sot një magazinë jepet me qira, e mbushur me asete apo logjistikë, do thirret përmbaruesi që si është, është në gjendje pune…Një lloj regjistrimi të shoqëruar me pamje filmike. Në rastin e dëmeve që i kanë ardhur pronës, vete përmbaruesi e konstaton dhe më pas mund të shkojë te detyra e tretë, mbledhja e borxhit me marrëveshje. I troket komshiut dhe i thotë ke sjellë një dëm, do ta zgjidhim me marrëveshje, apo do shkojmë në proces gjyqësor. Këto 4 shërbime kanë përfunduar si drafte”, shpjegoi ai.
Sipas tij, ka disa institucione shtetërore që gjejnë artifica ligjore për mos ekzekutimin e vendimeve. “Ministria e Transportit, Energjetikës, është një nga institucionet që ka më shumë vendime për ekzekutim, edhe në kuadër me ish-ministrinë për Mbrojtjen e Territorit”, u shpreh.
Kodra tha se shërbimi përmbarimor rankohet si një nga profesionet më të vështira.
“Kostoja mesatare është 70-80 mijë lekë të reja për çdo dosje. Tarifat tona fillojnë nga 10 mijë lekë. Numri i përmbaruesve privatë në Republikën e Shqipërisë është 140. Numri i zyrave mund të shkojë në 40-50. Ushtrojnë aktivitetin në Tiranë afërsisht 100 përmbaruese”, deklaroi.
