Eksperti i sigurisë rrugore, Gëzim Hoxha ka folur për aksidentin tragjik të ndodhur pasditen e së enjtes në Unazën Lindore të Tiranës, ku mbetën të vdekur 3 të rinj.
Për gazetarin Besard Jacaj, Hoxha shpjegoi se rruga ku ndodhi aksidenti është me standarde.
“Ajo është rrugë me standarde. Atje ka vendosur sinjalistikë edhe kufizim shpejtësi, edhe rrethrrotullim, pra po të thotë që po hyn në një rrethrrotullim. Dhe ti e di, se ti je një person i certifikuar, ke një leje drejtimi për të drejtuar mjetin, pra presupozohet që ti ke njohuri teknike dhe juridike, aq sa të kërkohet nga Kodi Rrugor për të drejtuar mjetin. Nëse bën të kundërtën e asaj, atëherë makina del jashtë kontrollit dhe bëhet e pabindur”, tha Hoxha per Klan News.
Për ekspertin, shkaku kryesor i aksidentit është shpejtësia tej normave të lejuara.
“Shpejtësia tej normave të lejuara. Shkaqet përse ka ardhur kjo shpejtësi mund të jenë të ndryshme. Momenti kur ka ndodhur ngjarja, nuk e ka kontrolluar më mjetin. Të del jashtë kontrollit. Do ta presësh, duhet të llogarisësh që në një sekondë, njeriu duhet ta përshkojë objektin për të marrë kthesën. Ai kur ka hyrë aty, distanca nga rrezja e kthesës është e vogël, e për rrjedhojë ka dalë”.
Dyshimet janë se Klevis Ruçaj udhëtonte me 200 km/h. Pikërisht shpejtësia e lartë, shpjegon sipas ekspertit, edhe distancën e madhe që ka përshkruar makina, nga çarja e barrierave metalike deri tek rënia në rrugë ku goditi makinën tjetër.
“Tregon se shpejtësia e tij ka qenë shumë e madhe. Nuk pasur një rënie të lirë, ka pasur një fluturim”, shton Hoxha.
Nga aksidenti i së enjtes humbën jetën Klevis Ruçaj, 20 vjeç, banues në Fier dhe dy pasagjeret, Erisilda Abedini, 22 vjeçe dhe Sikela Përroj, 23 vjeçe, të dyja banuese në Tiranë
