Aksidenti tragjik i ndodhur në mbikalimin e Saukut, ku u shuan tre të rinj të moshave 19-23 vjeç, sipas ekspertit rrugor Mamir Hodo ka qenë i paevitueshëm pasi mjetit tip “Audi A8” ka qenë duke lëvizur me shpejtësi të përllogaritur deri në 210 km/h dhe drejtuesi Klevis Ruçaj nuk ka bërë asnjë tentativë të frenojë.
Hodo tregoi se mjeti i 20-vjeçarit pas përplasjes me barrierën mbrojtëse ka “fluturuar” për rreth 31 metra dhe ka goditur murin e nënkalimit si edhe makinën tip “Hyundai”, ku udhëtonin 3 anëtarët e familjes Kurti, që mbetën të plagosur.
Ai u shpreh se i riu nuk ka marrë asnjë lloj mase duke parë rrezikun që po i kanosej, pasi s’ka asnjë gjurmë frenimi nga ana e tij.
“Mjeti tip Audi A8 ka qarkulluar me shpejtësi tej normave të lejuara. Mendohet, sipas përllogaritjeve, se shpejtësia e tij ka qenë 200-210 km/h në momentin e përplasjes me barrierën metalik. Pas përplasjes ka fluturuar rreth 31 metra dhe është përplasur me murin e nënkalimit. Aty ka goditur një mjet tip “Hyundai”, duke plagosur edhe drejtuesin e mjetit dhe 2 pasagjerët në këtë makinë.
Me këtë shpejtësi që po udhëtonte mjeti dhe me këtë barrierë metalike të vendosur, mjeti do e kalonte siç edhe ndodhi. Ai drejtues mjeti nuk ka marrë asnjë lloj mase duke parë rrezikun që po i kanosej. Nuk ka asnjë gjurmë frenimi, vetëm goditjen e barrierës mbrojtëse dhe më pas ngjarja e rëndë”, tha Mamir Hodo.
