Një sondazh i kryer nga Kompania Kërkimore ORC ka treguar se presidenti turk Rexhep Tajip Erdogan do të ishte mposhtur nga rivali i tij, Kemal Kılıçdaroğlu, lider i Partisë Laike Republikane Popullore (CHP), me 13 pikë, nëse zgjedhjet presidenciale do të mbaheshin në fillim të marsit.
Sondazhi i ORC u krye midis 4 dhe 6 marsit pasi u bë e sigurt kandidatura e Kılıçdaroğlu.
Rezultatet e sondazhit, i cili u krye me 1,850 pjesëmarrës në 28 provinca, treguan se kur Erdoğan përballet me Kılıçdaroğlu, ata do të merrnin përkatësisht 43.2 për qind dhe 56.8 për qind të votave.
Një sondazh i ORC-së i kryer në janar kishte treguar se Erdogan kishte marrë 42.5 për qind të votave ndaj 41.8 për qind të Kılıçdaroğlu, por gjërat duket se kanë ndryshuar shumë brenda dy muajve, kjo edhe për shkak të kemenaxhimit nga qeveria të situatës pas tërmetit vrastar.
Sondazhi i parë i kompanisë i kryer pasi Turqia u godit nga disa tërmete të fuqishëm muajin e kaluar zbuloi gjithashtu se mbështetja për Partinë për Drejtësi dhe Zhvillim (AKP) në pushtet ra nën 30%.
Sipas sondazhit, të kryer midis 22 dhe 27 shkurtit në 45 provinca turke, votat e AKP-së ranë nga 30.2% në janar në 29.1% pas tërmeteve, ndërsa mbështetja për partnerin e saj zgjedhor, Partinë e Lëvizjes Nacionaliste (MHP) e ekstremit të djathtë ishte 5.4 për qind, duke mos kaluar as pragun zgjedhor të sapo vendosur në vend prej 7%.
2023 Cumhurbaşkanlığı Seçimi
Aday Tercihleri“Erdoğan/Kılıçdaroğlu yarışında oyunuzu hangi adaya verirsiniz ?”
•Kılıçdaroğlu %56,8
•Erdoğan %43,2Tarih: 4-6 Mart 2023 pic.twitter.com/sRDLpACOpp
— ORC ARAŞTIRMA (@orc_arastirma) March 7, 2023
AKP dhe MHP së bashku me Partinë e Unitetit të Madh (BBP) formojnë Aleancën Publike kundër një blloku opozitar prej gjashtë partish, të njohur si Aleanca e Kombit.
Në fillim të kësaj jave, 74-vjeçari Kılıçdaroğlu u shpall si kandidati presidencial i këtij blloku, pasi doli fitues nga një betejë e mprehtë lidershipi midis krerëve të partive, të bashkuar në qëllimin e vetëm për t’i dhënë fund dy dekadve të Erdoganit në pushtet dhe dominimit të kombit prej 86 milionë banorësh.
Kandidatura e Kılıçdaroğlu u bë publike fillimisht pas një takimi të bllokut opozitar më 2 mars dhe u zyrtarizua më 6 mars.
Brenda bllokut opozitar, mbështetja për partinë kryesore opozitare CHP është 23.5 përqind në sondazhin e ORC, ndërsa 19.5 përqind shkojnë për Partinë İYİ (Mirë). Mbështetja për Partinë Demokratike të Popullit pro-kurde (HDP), e cila nuk është në aleancën opozitare, ndërkohë është 8.1 për qind.
Ndërkohë, një sondazh i kryer nga Aksoy Research midis 23 dhe 26 shkurtit tregoi gjithashtu mbështetjen e aleancës AKP-MHP në 38.9 për qind, ndërsa gjashtë partitë e opozitës do të kishin marrë 43.4 gjithsej, me HDP që kishte mbledhur 12 për qind të votave.
Erdogan dhe qeveria e tij kanë marrë kritika të gjera nga viktimat e tërmetit, si dhe nga politikanët e opozitës për shkak të asaj që ata pretendojnë se ishte përgjigja e tyre e dobët ndaj tragjedisë. Ata thanë se dështimi i qeverisë për të përgatitur vendin për tërmetet dhe dështimi i saj për të koordinuar përpjekjet e kërkim-shpëtimit në mënyrë efektive dhe në kohë çoi në numrin e madh të vdekjeve, i cili është në më shumë se 45,000 në Turqi.
