Parlamenti britanik nisi këtë të Martë diskutimet për miratimin e projektligjin e ri të paraqitur nga qeveria, që dëbon të gjithë emigrantët e jashtëligjshëm. Shqipëria u përmend si një shembull negativ nga Sekretarja e Brendshme, Suella Braveman.
Përpara deputetëve të dhomës së ulët, Sekretarja për Çështjet e Brendshme Suella Braveman tha se plani ka për qëllim t’i japë fund një herë e mirë dyndjes me varka në brigjet britanike të emigrantëve të jashtëligjshëm.
“Përmes këtij plani synohet që e gjithë bota ta marrë vesh se në Britaninë e Madhe nuk hyhet ilegalisht, pasi në të kundërt, burgosesh dhe dëbohesh”, theksoi ajo.
Braverman mori sërish si shembull shqiptarët.
“Vitin e kaluar, 17,000 referime u deshën mesatarisht 543 ditë për t’u marrë në konsideratë. Ligjet aktuale të skllavërisë moderne po keqpërdoren për të bllokuar largimet, prandaj ne pranuam më shumë se 50 përqind të kërkesave për azil nga qytetarët e një vendi të sigurt evropian dhe aleat të NATO-s, Shqipërisë”, deklaroi.
Çfarë parashikon projektligji i ri
Plani që po diskutohet në parlament parashikon vendosjen në masë arresti të të gjithë personave që hyjnë në Britaninë e Madhe në rrugë të jashtëligjshme. Përjashtim bëhet vetëm për personat nën 18 vjeç dhe të sëmurët. Marrja e azilit përjashtohet kategorikisht.
Ata që nuk paraqesin fakte dokumente dhe fakte ligjore bindëse që nuk përndiqen apo keqtrajtohen në vendet e tyre të origjinës brenda 28 ditësh pas arrestimit do të ndalohen përgjithmonë të hyjnë në Britaninë e Madhe. Për ata që vijnë nga vende të sigurta origjine si Shqipëria do të riatdhesohen menjëherë, ndërsa ata që nuk paraqesin dokumente ose dokumente që vlerësohen si false, do të dërgohen në Ruandë.
Sunak: Nëse vini ilegalisht, nuk mund të kërkoni azil
Kryeministri Rishi Sunak këmbënguli se Britania do të përdorë “çdo mjet në dispozicionin tonë”, duke shtuar se ligji i ri “është i ashpër, por është i nevojshëm dhe i drejtë”.
“Ne e kemi provuar në çdo mënyrë tjetër dhe nuk ka funksionuar, ky vend dhe qeveria juaj duhet të vendosin se kush vjen këtu, jo bandat kriminale”, theksoi ai.
“Ne do të fitojmë”, u shpreh Sunak.
“Nëse vini në Mbretërinë e Bashkuar ilegalisht, nuk mund të kërkoni azil”, tha ai.
Prej kohësh, në Britani, emigrimi masiv i shqiptarëve në mënyrë të jashtëligjshme është komentuar me nota shqetësimi nga politika dhe mediat.
