Ditën e djeshme në Kongresin e parë të Shëndetësisë të mbajtur nga Ministria e Shëndetësisë në Tiranë, kryeministri Edi Rama njoftoi vendimin për rritjen e pagave të mjekëve specialistë me 50 mijë lekë të reja në muaj, duke nisur nga 30 prilli.
“Më 30 prill mjekët specialistë do të fillojnë të marrin 50 mijë lekë të reja plus në pagën e tyre. Janë 500 dollarë plus në muaj, janë 6 mijë dollar plus në vit. Janë duke filluar nga, ndërkohë që do të mbajmë zotimin për rritjen 7% të mjekëve të përgjithshëm dhe për infermierët. Shpresojnë që mjekët specialist të mos na kërkojnë dhe 7% plus mbi 50 mijë lekëshin. Në ndërkohë edhe mjekëve të përgjithshëm dhe infermierëve po u themi që ne po përgatisim rritje proporcionale me këtë të mjekëve specialist dhe shpresojmë shumë që në vitin 2024 do të kemi edhe për ta një rritje të ngjashme”, tha Rama.
Më tepër sesa një tentativë për të ndalur hemorragjinë në sistemin shëndetësor, ku qindra mjekë dhe infermierë zgjedhin të largohen çdo vit për t’u punësuar në vendet e BE dhe kryesisht në Gjermani, kjo lëvizje e Ramës shihet si një skemë për të grumbulluar vota më 14 Maj.
Joshja e mjekëve me një shtesë prej 50 mijë lekësh nuk është alternativë përballë pagave dinjitoze dhe komoditetit në shërbime që ofrojnë vendet e BE, në ndryshim nga sistemi shëndetësor shqiptar dhe këtë Rama e di mirë.
Sipas mjekut të njohur Ilir Alimehmeti rritja e pagës së mjekëve specialistë lidhet fort me fushatën elektorale dhe bindjen e Ramës se mund të maksimizojë votat për zgjedhjet lokale të 14 majit.
Në emisionin “Good Morning Albanians” Alimehmeti u shpreh se prej vitesh pagat janë të ulëta dhe qeveria që drejton Shqipërinë prej 2013 nuk ka tentuar të përmirësojë sistemin shëndetësor duke investuar apo duke motivuar mjekët dhe infermierët.
“Rrogat e ulëta i kemi prej shumë vitesh, përse tani? Unë mendoj se është e lidhur me fushatën elektorale të 14 majit. Pra, supozohet që me atë datë rritet rroga e majit, pas 30 prillit, e cila paguhet në qershor. Ne e kemi të qartë që rrogën e këtij muaji, e marrim muajin tjetër, e cila ndodh pas fushatës”, u shpreh Alimehmeti.
