Kreu i Partisë së Lirisë, Ilir Meta në një konferencë për mediat paraditen e sotme ka dhënë komentet e tij mbi situatën politike në vend dhe ngërçin që është krijuar me regjistrimin në zgjedhje pas vendimit të Gjykatës së Apelit për të dërguar për rigjykim në Shkallën e Parë, çështjen e vulës së Partisë Demokratike.
Meta iu përgjigj interesit të gazetarëve për pozitat në të cilat ndodhet ish-kryeministri Sali Berisha, të cilit i duhet të vendosë për mënyrën sesi kandidatët e dalë nga Primaret do të hyjnë në zgjedhjet e 14 majit.
Kreu i PL u përgjigj duke thënë se Berisha është vula përfaqësuese e PD-së për aspektet e saj pozitive dhe risolli në kujtesë 6 marsin për të treguar suksesin që e pret koalicionin opozitar.
Meta gjithashtu nënvizoi se bashkëpunimi me Berishën ka vetëm një kusht dhe ajo është beteja me Edi Ramën deri në largimin e tij, ndaj edhe mbetet në kontakt të vazhdueshëm me kreun e PD dhe të gjithë opozitarët në Shqipëri.
“Berisha është vetë vula e gjallë e PD, në kuptimin e frymëzimit dhe të gjithë aspekteve të tjera pozitive. Në 6 mars nuk kam qenë në koalicion me zotin Berisha sepse nuk kam qenë kryetar. Megjithatë jam krenar që firmosa për t’i dhënë mundësi, Shqipërisë, shqiptarëve dhe të gjithë botës se kush është opozita e vërtetë. Opozita që duan shqiptarët që ishin të tradhtuar nga opozita false që i fali reformën në drejtësi Ramës. Jam online me zotin Berisha dhe me demokratët e vërtetë”, shtoi Meta.
Meta u shpreh se asnjë mekanizëm nuk i ndalon ata që i quajti superkandidatë të koalicioni të përbashkët PD-PL të jenë fitues në zgjedhjet e 14 majit.
“Nuk ka mekanizëm, hile dhe poshtërsi që i ndalon superkandidatët e primareve që të jenë fitimtarë në 14 maj. Këtë proces e udhëhoqën shqiptarët, tani janë superkandidatët që na udhëheqin ne; në Tiranë Belind Këlliçi, në Elbasan Luçiano Boçi, në Durrës Igli Cara”, tha Meta.
