Beteja ligjore për “vulën” e PD do të vazhdojë edhe në shkallë më të larta, madje deri në Gjykatën Evropiane të të Drejtave të Njeriut.
Deklarata është bërë nga avokatia dhe pedagogia, Ledina Mandija, e cila tha në studion e lajmeve në “Panorama TV” se i gjithë procesi ishte një skenar i turpshëm dhe që është bërë në bashkëpunim me Ramën dhe Bashën.
Mandija shpreson që Gjykata e Apelit të publikojë sa më parë vendimin e arsyetuar, me qëllim që t’i drejtohen Gjykatës së Lartë. Kjo e fundit nëse nuk jep një vendimmarrje korrekte, më pas çështjen do ta çojnë Strasburg.
“Skenari është i qartë, kjo është e turpshme për një parti të djathtë që kishte në fokus të saj demokracinë dhe lirinë. Të përdorësh metoda të tilla kjo është e dhimbshme Anëtarësia është e irrituar dhe kërkon goditjen e vendimit në rrugë më të larta. Ky është një rekurs i posaçëm referuar kodit të procedurës civile dhe godite në 5 ditë në gjykatën e lartë nga momenti që gjykata e apelit jep vendimin e arsyetuar. Shpresojmë që gjykata të na japë vendimin e arsyetuar dhe ne të kalojmë në Gjykatën e Lartë.
Do të duhet patjetër të kontrollojë shkeljet procedurale të personave që kanë ushtruar të drejtën e ankimit në një proces që ato nuk kishin palë dhe kanë dështuar për të përdorur mjete të tjera për të goditur ato veprime të paligjshme. Më pas nëse nuk do të kemi një vendimmarrje korrekte nga gjykata e lartë, mjetet procedurale me kushtetutë janë gjykata kushtetuese dhe gjykata evropiane e të drejtave të njeriut. Nuk do ishte mirë që kjo punë të shkonte kështu”, u shpreh Mandija.
E pyetur në lidhje me ftesën që Alibeaj i bëri kandidatëve të Primares për t’u bashkuar me ata, Mandija tha se edhe kjo është pjesë e skenarit, për të joshur disa persona.
“Kjo vazhdon të jetë pjesë e një skenari. Ashtu sikurse u joshën nga ofertat e kryeministrit ka dhe disa të tjerë që mendojnë se do joshen nga oferta e tyre për tu bërë kryetar bashkie meqë ata kanë vulën. Nuk besoj se personat që kanë integritet të bëhen pjesë e këtij skenari të pisët dhe të ndërpresin pritshmërinë e anëtarësisë. Nuk mund të kërkosh bashkëpunimin për të mbajtur godinën dhe vulën dhe pastaj të denoncosh korrupsionin e këtij personi”, deklaroi ndër të tjera Mandija.
