Përfaqësuesi ligjor i PD, Franc Nuri deklaron se është në fuqi vendimi i gjyqtarit Agron Zhukri që njohu si të vlefshme ligjërisht vendimet e Kuvendit Kombëtar të 11 dhjetorit 2021.
Nuri tha se vendimi i Gjykatës së Apelit nuk është përfundimtar dhe i formës së prerë. Ai sqaroi se Gjykata e Apelit nuk e ka prishur apo ndryshuar vendimin e shkallës së parë.
“Nuk është e vërtetë që Gjykata e Apelit ia ka kaluar vulën fraksionit tjetër, kjo nuk është e vërtetë. Gjykata e Apelit nuk e ka prishur dhe ndryshuar vendimin e shkallës së parë. Po ta kishte ndryshuar dhe të kishte vendosur që vula do t’i kalonte krahut tjetër atëherë po. Gjykata e Apelit ka bërë një shpikje që ka rrëzuar ankimin dhe ka pranuar të prishë vendimin e shkallës së parë. Kjo hile juridike është bërë tre ditë para poërfundimit të afatit maksimal të regjistrimit të subjekteve zgjedhore për t’i prishur punë PD. Vendimi i Apelit nuk është i formës së prerë. Ai ka lejuar rekurs në Gjykatën e Lartë. Është një nga rastet e vetme ku vendimet e Apelit nuk janë përfundimtare dh të formës së prerë ç’ka do të thotë se vendimi i Zhukrit është në fuqi”, u shpreh Nuri per Syri TV.
Duke iu referuar kërkesave që janë dorëzuar në KQZ nga PD dhe përfaqësuesit e Enkelejd Alibeajt, Nuri tha se këta të fundit nuk mund të regjistrohen ligjërisht, duke dhënë edhe arsyet.
“Nuk i takon KQZ-së të përcaktojë se kush është kryetar i PD, janë anëtarët e PD ata që e përcaktojnë. KQZ ka për detyrë të shqyrtojë dokumentacionin. Ne mendojmë që kemi dokumentacionin e plotë për t’u regjistruar në KQZ. Pala tjetër me akrobacitë e autorizimeve të dhëna 1 vit përpara, pastaj me dorëheqje publike të paregjistruara, me vendime apeli që nuk është në fuqi ne shohim se ka mangësi të theksuara, për mendimin tim nuk do mund të regjistrohen ligjërisht”, tha Nuri.
