Deputeti i Partisë Demokratike, Oerd Bylykbashi, i cili shoqëronte përfaqësuesin ligjor Ivi Kaso ditën e djeshme në sallën e gjyqit të Gjykatës së Apelit ku u vendos fati i “Vulës” së selisë blu, ka zbardhur detaje nga seanca.
Bylykbashi në një video të shpërndarë mbrëmjen e djeshme pas komunikimit të vendimit nga togat e zeza u pa duke komunikuar menjëherë në telefon, ndërsa sot u shpreh se kishte presion në sallë dhe “urdhrin” për vendimin e dha kryeministri Edi Rama.
I pyetur se çfarë ndodhi në sallën e gjyqit, Bylykbashi nuk e mohoi se kishte shumë tension dhe u shpreh se Lulzim Basha e Enkelejd Alibeaj nuk kishin këllqe për të ndikuar vendimin e gjykatës, por këtë e bëri kryeministri, i cili nuk do zgjedhje të lira në vend.
“Kur je në një proces të një lloji të tillë tensioni është i madh po ashtu dhe presoni. Por kjo çështje ia kalon edhe çështjeve që prodhuan Lulzim Bashën kryetar. Por kjo ishte shumë më e madhe sepse për herë të parë në 32 vite, partia e dytë me e madhe më numër votash, nuk është vetëm fakti që është PD në atë çështje, por si të mos lihet PD të zgjidhet. Kemi gati një vit që është marrë vendimi. A mund ta mbajë Basha e Alibeaj të varur gjykatën? Jo sepse nuk kanë këllqe. Këtë mund ta bëjë vetëm Edi Rama. Në këtë aspekt e vetmja gjë që mund të prodhonte këtë zvarritje ishte presioni i Ramës. Zgjedhjet janë tani, por me datë 6 mars është afati”, tha ai.
Sakaq referuar zërave për një kthim të mundshëm të Lulzim Bashës në politikë pas këtij vendimi të Apelit, Bylykbashi tha se “Basha ka dhënë dorëheqjen dhe ky është fakt i njohur dhe revokimi nuk ekziston”.
“Pra është thënë që e kemi zëvendësuar, është Alibeaj. Ndryshe nga Basha diferenca është se Berisha u zgjodh, pra duhet të zgjidhesh në bazë të statutit”, tha deputeti i PD.
Më tej ai nënvizoi se vendimi për të rikthyer Vulën në Shkallën e Parë nuk është përfundimtar dhe PD e drejtuar nga Sali Berisha do të bëjë rekurs në Gjykatën e Lartë.
“Ne do t’i bëjmë rekurs në Gjykatën e Lartë. Do të kërkojmë drejtësi edhe pse e dimë çfarë ka prodhuar reforma në drejtësi. Në këtë çështje e çojmë në Strasburg, pro duhet kuptuar se gjykata ka rolin e mbajtjes shënim dhe regjistrimit në regjistër. S’mund të mbahet peng një parti politike me një vendim gjykate”, theksoi Bylykbashi.
