Kuvendi ka nisur seancën plenare, ndërsa Oerd Bylykbashi, në emër të anëtarëve të opozitës në Këshillin e Mandateve dhe Imuniteteve, ka paraqitur qëndrimin lidhur me kërkesën e SPAK-ut për imunitetin e Belinda Ballukut, ish-zv.Kryeministre dhe ish-ministre e Infrastrukturës.
Bylykbashi tha se sipas SPAK, Belinda Balluku akuzohet për 11 fakte penale.
“Sot është një seancë e rëndësishme që do të lerë gjurmë në parlamentarizmin shqiptar”, iu drejtua Bylykbashi, deputetëve në seancë plenare. Ai u ka kërkuar deputetëve që të votojnë pro kërkesës së SPAK, duke i dhënë autorizimin Prokurorisë Speciale që të arrestojë Belinda Ballukun.
“Sipas SPAK, Balluku ka kryer në mënyrë të përsëritur veprën penale të shkeljes së barazisë në tendera, në mënyrë të përsëritur”, tha Bylykbashi.
Ndërsa citoi Komisionin e Venecias, deputeti i PD-së tha se imuniteti nuk mund të mbrojë personalisht një deputet nga ndjekja penale.
“Paprekshmëria e deputetit ndodh vetëm kur akuzat janë të motivuara politikisht, ose kur akuzat kanë karakter partiako-politik”, tha Bylykbashi, duke lexuar raportin në emër të deputetëve të opozitës.
