Në mbledhjen e grupit parlamentar të Partisë Demokratike që u zhvillua pasditen e sotme, Sali Berisha njoftoi lëvizjen e radhës të kësaj force politike, pas vendimit të marrë nga Gjykata e Apelit të Tiranë për të dërguar për rigjykim në Shkallën e Parë ëështjen e vulës së selisë blu.
“Vendimi i Apelit është një histori turpi që nuk mund të pranohet kurrë, ndaj dhe sapo të zbardhet në do të bëjmë rekurs, në Gjykatën e Lartë, Kushtetuese dhe në gjykatat Europiane të të drejtave të njeriut”, tha Berisha para deputetëve, duke u shprehur se është arritur në këtë konkluzion pas dikutimeve në Kryesi.
Por më tej Berisha surprizoi jo pak teksa shtoi se Partia Demokratike do të dorëzojë nesër të gjitha dokumentet për t’u regjistruar në procesin zgjedhor të 14 majit.
“Vetëkuptohet, nesër do të dorëzojmë të gjitha dokumentet për regjistrim”, duke shpjeguar se regjistrimi nuk pengohet nga “vendimi i gjykatës deri sa të vendosë gjykata më e lartë”.
“Sepse ky vendim është plotësisht i rikursueshëm në natyrën e tij”, tha Berisha, duke dhënë më tej edhe sqarimin në bazë të Kushtetutës për regjistrimin që PD e drejtuar për tij do të bëjë.
“Ka një arsye tjetër po kaq të fortë. Kodi zgjedhor në nenin 64, pika 2, b; përcakton që partia politike të regjistrohet, detyron që të jetë emri i kryetarit të Partisë, Adresa dhe gjithçka tjetër rreth tij. Në deklaratën e tij se nuk do të blejë vota, nuk ka parashikuar se kryetari është i blerë vetë. Se çfarë ndodh? Edi Rama e mban dhe Lulzim Basha në një akt vetëposhtërimi të paimagjinueshëm, pasi e detyruan deputetët të japë dorëheqjen dhe e dha dorëheqjen, që nga marsi e deri më tani, tani i thotë Edi Rama që nuk ke dhënë dorëheqjen, je kryetar dhe e ngarkon me detyrë, meqenëse banaliteti shkon gjer në qiell, po u paraqite ti si kryetar, vetëm për të emëruar Enkelejdin kryetar. Për të autorizuar Enkelejdin në emrin tënd, Alibashën në emrin e tij. Kjo është skema”, shpjegoi Berisha.
Në përfundim të fjalës së tij ish-kryeministri u kthye nga KQZ, duke thënë se institucioni që legjitimon procesin zgjedhore nuk do e pranojë kurrë regjistrimin e Enkelejd Alibeajt.
“Unë besoj se KQZ-ja nuk do të pranojë kurrë një gjë të tillë. Them se do ti përmbahet ligjeve dhe kodit dhe nuk do të lozë me një procedurë të tillë, e cila damkos zgjedhjet, institucionin e administrim të tyre, pa filluar. Ndaj dhe ne do të paraqesim të gjithë dokumentet për regjistrim në KQZ, siç na takon. Dorëzojmë edhe vendimin, i cili në kohën që nuk është bërë rekursi, është në fuqi plotësisht, vendimi i gjykatës së faktit. Normalisht duhet të jetë i vetmi vendim, nuk shqyrtohen kurrë në Apel këto vendime”, theksoi Berisha.
