Gjykata e Apelit shfuqizoi këtë të premte vendimin e gjyqtarit Agron Zhukri për çështjen e “Vulës” së PD, duke kthyer çështjen për rigjykim në Shkallën e Parë me një trup të re gjyqtarësh.
Teksa Gjykata vendosi pro grupimit të Enkelejd Alibeaj dhe përfaqësuesi i tij ligjor Indrit Sefa njoftoi se do të regjistrohen për zgjedhjet lokale të 14 majit ditën e hënë, kreu i Partisë Demokratike Sali Berisha e ka ndjekur komunikimin e vendimit nga selia blu.
Në një deklaratë për shtyp nga selia blu, Sali Berisha mbajti qëndrimin e tij, duke akuzuar kryeministrin Edi Rama se e kishte parapërgatitur vendimin në zyrën e tij dhe për këtë ishin në dijeni edhe diplomatë të caktuar të akredituar në Tiranë.
“Sot në darkë Edi Rama, komunikoi vendimin e tij me të cilin ka një synim, likuidimin e opozitës shqiptare dhe pluralizmit politik në Shqipëri. Sot tre gjykatës në një proces të pashembullt kundër pluralizmit lexuan vendimin e përgatitur kohë më parë në zyrën e Edi Ramës, të paralajmëruar kohë më parë ambasadorëve të caktuar, të akredituar në Tiranë të paralajmëruar në parlamentin shqiptar. Sot gjithashtu jemi në një orë, kohë prove të vërtetë dhe unë kam besimin më të madh se demokratët shqiptarë janë të vendosur të mbrojnë me çdo kusht dhe çmim pluralizmin në Shqipëri dhe PD-në. Vazhdimi i skenarit të filluar me tradhtarin e kombit Amerikane McGongial, të kaluar në një seri etapash sot konkludoi me një vendim të pashembullt në Europë dhe botë”, tha Berisha.
Sipas kreut të PD, vendimi i sotëm ishte i qartë dhe nën presionin e Edi Ramës për të penguar demokratët e vërtetë që të hyjnë në zgjedhjet lokale të 14 majit.
Lideri i opozitës nënvizoi se edhe vetë përfaqësuesit ligjor të Alibeajt ia komunikuan trupës së togave të zeza se nuk janë palë në proces, por ata nuk e pranuan.
“Në procesin e sotëm dua të informoj shqiptarët se ata të cilët kishin kërkuar zyrtarisht të shpalleshin palë, i thanë gjykatës se nuk kemi qenë palë në proces, por gjykatësit lexuan vendimin e shkruar në zyrën e Edi Ramës dhe anuluan tre ditë, tre ditë pasi e mbajtën 9 muaj, anuluan tre ditë para skadimit të afatit të regjistrimit në zgjedhje, një vendim legjitim, vetëm e vetëm se ishte urdhëruar nga Edi Rama. Çdo gjykatës me integritetin minimal, kur pala tjetër deklaronte se nuk ishte palë në këtë proces, mbyllte procesin dhe nuk vazhdonte më tutje, por ata kishin në sirtar vendimin e shkruar në zyrën e Edi Ramës për të ndëshkuar opozitën politike”, nënvizoi ai.
