Një shpërthim i fuqishëm me tritol është regjistruar mbrëmjen e kësaj të premte në fshatin Arrameras të Fushë-Krujës, duke tronditur të gjithë zonën.
Lënda plasëse ishte vendosur në një mobilieri. Godina është në pronësi të Bujar Caracit (banor i zones), por i ishte dhënë me qira dhëndrit të tij, shtetasit Desar Çangu.
Si pasojë e shpërthimit, mësohet se ka patur vetëm dëme materiale, ku siç shihet dhe në pamjet e mëposhtme kanë qenë të shumta, me biznesin që është shkatërruar thuajse plotësisht nga eksplozivi.
Tritoli ishte vendosur në pjesën e pasme të objektit, ku mësohet se ka pasur edhe kamera sigurie dhe ka shkaktuar dëme edhe tek objektet përreth. Me urgjencë janë nisur drejt Fushë-Krujës forca të shumta policie.
Ndërkaq një numër tepër i madh banorësh kanë dalë në rrugë të tmerruar, pasi zhurma e madhe e shpërthimit është dëgjuar në të gjithë zonën.
NJOFTIMI I POLICISE:
Rreth orës 20:40, në aksin rrugor kryesor “Fushë Krujë-Tiranë”, në fshatin Arrameras, në ambientet e jashtme të një ndërtese (mobileri) të marrë me qira nga shtetasi D. C., banues në fshatin Larushk, Fushë Krujë, ka shpërthyer një sasi lënde plasëse, duke shkaktuar dëme të shumta materiale.
Menjëherë në vendngjarje kanë shkuar shërbimet e Policisë të cilat vijojnë kontrollet në zonë, për kapjen e autorit/ëve.
Në vendngjarje ndodhen drejtuesit vendorë të Policisë dhe grupi hetimor dhe në drejtimin e Prokurorisë, vijon puna për zbardhjen e plotë të rrethanave të ngjarjes, identifikimin e kapjen e autorit/ëve.
