Një i ri është arrestuar në fshatin Perondi të Kuçovës nga policia, që njofton se në banesë i është gjetur drogë dhe armë.
Në pranga u vu Vilson Leshtori, 23 vjeç, banues në fshatin Perondi, Kuçovë. Aksioni sipas bluve, erdhi “bazuar dhe në informacionet e siguruara përmes inteligjencës informative, për një rast të kësaj veprimtarie kriminale”.
“Gjatë operacionit, në rrugën e fshatit Perondi, shërbimet e Policisë kanë ndaluar për kontroll automjetin tip ‘Smart’, me të cilin qarkullonte ky shtetas dhe si rezultat i kontrollit gjetën një sasi të vogël lënde të dyshuar narkotike cannabis sativa, e cila u sekuestrua në cilësinë e provës materiale. Në vijim të operacionit, gjatë kontrollit të ushtruar në banesën e shtetasit V. L., shërbimet e Policisë gjetën 20 kg lëndë të dyshuar narkotike cannabis sativa, 1153 fara të dyshuara narkotike cannabis sativa, 1 armë zjarri pistoletë, 1 armë zjarri pushkë, 2 krehra me fishekë dhe një sasi tjetër municioni luftarak, të cilat u sekuestruan në cilësinë e provës materiale, së bashku me 2 aparate celulare”, njoftoi policia.
Nga veprimet hetimore, shtojnë të njëjtat burime, dyshohet se ky shtetas ushtronte veprimtarinë kriminale të prodhimit të lëndës narkotike kanabis dhe të shitjes së saj në doza, në Kuçovë dhe në Berat.
“Vijojnë veprimet hetimore për dokumentimin e plotë të veprimtarisë krimiale të këtij shtetasi”, ndërsa “materialet iu referuan Prokurorisë pranë Gjykatës së Rrethit Gjyqësor Berat, për veprime të mëtejshme’, mbyllet njoftimi i bluve.
