Qeveria ka vendosur që e diela e 5 Marsit të jetë një ditë zie kombëtare në Shqipëri.
Kryeministri Edi Rama, i cili ka dhënë lajmin me anë të një postimi në Facebook shprehet se vendimi është marrë për të nderuar viktimat e tragjedisë në Greqi, që u shkaktua si spasojë e përplasjes së dy trenave dhe deri më tani ka marrë 57 jetë udhëtarësh të linjës Athinë-Selanik.
“Ditën e dielë Shqipëria do të nderojë me një ditë zie viktimat e tragjedisë, duke u bashkuar simbolikisht me Greqinë mike me flamurin kombëtar të ulur në gjysëm shtizë”, shkruan Rama.
Ndër të tjera kreu i qeverisë shprehet se tragjedia e Greqisë është edhe tragjedia jonë si shtet fqinj.
“Tragjedia e Greqisë është edhe tragjedia jonë, dhimbja për jetët e humbura në aksidentin e tmerrshëm është edhe jona dhe ky është një nga ato momente jetësore, kur një humbje e madhe tek fqinji të tregon më shumë se sa njëqind gëzime që jetët tona janë të ndërlidhura pazgjidhshmërisht, e se duhet të bëjmë çmos që t’i bëjmë ato sa më të mira, duke bashkëpunuar gjithnjë e më shumë me njëri-tjetrin”, shkruan Rama në Facebook.
Ndërkohë, deri më tani mediat në vendin fqinj raportojnë se 57 persona kanë humbur jetën nga aksidenti tragjik hekurudhor që ndodhi të martën.
Kjo tragjedi në transportin publik është më e rënda në historinë e vendit dhe gjasat janë që numri i viktimave të rritet pasi autoritetet thonë se 56 persona rezultojnë të zhdukur në vagonat e shkrumbuar.
Sakaq, mes 6 të plagosurve që janë në gjendje të rëndë në Repartin e Mjekimit Intensiv ndodhen edhe dy shtetas shqiptarë, të identifikuar si Roberto Drizdi (25 vjeç) dhe Anisa Liuri (23 vjeçe).
Roberto Drizdi ndodhet në reanimacion i intubuar, me dëmtime të rënda (thyerje gjymtyrësh), ndërsa Anisa (Anastasia) Liuri ndodhet e intubuar, me djegie të rënda dhe do të transferohet në Spitalin e traumës Papanikolau në Selanik.
Të humbur, në pritje të përgjigjes së ADN që kanë dhënë të afërmit janë edhe shqiptarët Klaudia Lato (Lata), Denis Ruci dhe Pavlin Bozo.
Ndërkohë, në Spitalin e Përgjithshëm të Larisës ndodhet Elisia Paço, 18 vjeç, e cila pritet të dalë ditën e sotme nga spitali. Në Spitalin Universitar të Larisës ndodhet Olta Kulla, 20 vjeç me dëmtime relativisht të lehta, kurse Maria Dimza, me dëmtime të lehta, ka dalë nga spitali në gjendje të përmirësuar.
