Ka nisur me tension seanca e sotme plenare ku po diskutohet mocioni me debat i kryeministrit me opozitën referuar implikimit të Ramës në aferën “Mc Gonigal”.
Gjatë fjalës së tij Edi Rama e ka nisur duke sulmuar opozitë madje është justifikuar sot në Parlament se akt akuza ndaj ish agjentit të FBI-së, Charles McGonigal , është asgjë më shumë sesa një raportim korrekt i takimeve të zyrtarit amerikan në Tiranë.
Në fjalimin e mbajtur gjatë mocionit me debat, Rama tha se në akt akuzë thuhet vetëm që personi A ka marrë një material nga zyra e kryeministrit për çështjen e financimit të PD-së me para ruse, por shtoi se i vetmi person i cili është në hetim për këtë çështje është McGonigal.
Gjithashtu Rama tha se “dhurata” e vetme që ka marrë nga “Mcgonigal” ishte një kapele e FBI-në, kurse deputetët e opozitës kanë ndërhyrë nga vendi duke kundërshtuar.
“Prej javësh ka shpërthyer një kanal ujërash të zeza në përpjekje për të shfrytëzuar politikisht një proces gjyqësor në SHBA që s’ka asnjë lidhje me Shqipërinë, qeverinë dhe mua personalisht. Çfarë ka ndodhur konkretisht? Një ish zyrtar i lartë i FBI, ish shefi i kundër inteligjencës amerikane në Nju Jork akuzohet për një bashkëpunim të paligjshëm me oligarkun rus Deripaska. Gjatë hetimeve prokurorët kanë konstatuar edhe një sërë shkeljesh që lidhen me udhëtimet e McGonigal ku akt akuza shënon se ka vizituar Shqipërinë dhe është takuar me mua. Akt akuza nënvizon se ka marrë para borxh nga personi A. Në rreshtat e akt akuzës përmendet edhe hetimi amerikan i parave ruse të PD-së ku shënohet edhe që personi A ka marrë një material nga zyra ime për këtë çështje. Akt akuza flet edhe për një person B këshilltar i jashtëm i imi disa vite më parë. Procesi nuk ka asnjë të akuzuar tjetër përveç McGonigal.
Pavarësisht se pas një hetimi të gjatë për të cilin kam marrë vesh vetëm kur jam pyetur nga një gazetar amerikan i Insider, në të gjithë rreshtat e akt akuzës nuk ka asnjë akuzë dhe asnjë të dhënë tjetër përveç raportimit korrekt të takimeve të mia me zyrtarin e lartë amerikan, apo faktin e vërtetë se ai ka folur me mua për rrezikun rus.
Dihen, njihen dhe shquhen botërisht për nisma të kësaj natyre ata që më akuzojnë mua në këtë sallë. Janë po ata që kur ishin në pushtet i kanë bërë të gjitha të zezat dhe jo vetëm s’ka nevojë për shumë shpjegime rreth tyre, por unë skam ardhur sot dhe s’do të vijë më për ta. Këtu do vijë sa herë të jetë nevoja për respekt të zgjedhësve që përfaqësoj dhe në respekt të deputetëve të shumicës që s’mund t’i lija vetëm. Të vetmen dhuratë që mora nga McGonigal ishte dhuratë simbolike siç shkëmbejnë të gjithë gjatë takimeve zyrtare. Dhurata e vetme ishte një kapele e FBI-së që e kam edhe sot tek zyra ime”, tha Rama.
Ndërhyjnë nga vendoi deputetët e opozitës duke i thënë Ramës: “Sa miliona i dhurove ti Gonigalit?”
