Në mënyrën më tragjike të mundshme Shqipëria e nisi muajin mars të vitit 2023, teksa këtë të mërkurë 40-vjeçari Dan Hutra nga Vaqarri i Tiranës përgjaku kryeqytetin, duke i marrë jetën tre grave dhe duke lënë të plagosura tre të tjera.
Në krime të ngjashme me ato të një “serial killer-i”, Dan Hutra plagosi fillimisht me thikë pasi refuzoi t’i jepte para, ish të dashurën e tij Marjana Gurakuqi në zonën e “Astirit” dhe më pas iu drejtua Paskuqanit ku me kallashnikov ekzekutoi 30-vjeçaren Mevlute Hysa (ish-kunata e tij) dhe Hasime Dafkun (e fejuara e vëllait të ish-gruas së tij).
Objektivi i tij kryesor ishte ish-bashkëshortja 35-vjeçare Elena Hysa, e cila mbeti e plagosur, së bashku me nënën 60-vjeçare Kujtime Hysa pas plumbave të kallashnikovit dhe goditjeve me thikë të Hutrës.
40-vjeçari nuk u ndal me kaq, por pak pas minutash i mori jetën me tre plumba edhe Etleva Kurtit në banesën e saj në rrugën “Besëlidhja” të Kamzës, krim që e kishte paralajmëruar edhe në burgun e Drenovës, ku kishte kërcënuar vëllain e së ndjerës, Vladimir Kurti (i dënuar me burg përjetë) se do të vriste atë, e më pas të motrën dhe nënën kur të fitonte lirinë.
Në të njëjtën kohë me ngjarjet e rënda që kishin për protagonist 40-vjeçarin në Tiranë, krimi ngriti krye edhe në Belsh të Elbasanit, ku “Shqiponjat” u detyran të ndiqnin për një orë para se t’i vendosnin prangat një 35-vjeçar që zbrazi armën mbi një autobus udhëtarësh, pas konfliktit për konkurrencë me pronarin e një tjetër agjensie.
Përgjakja në këtë mënyrë e kryeqytetit ka tronditur sot opinionin publik dhe ka nxjerrë edhe njëherë në pah faktin sesa e pasigurtë është jeta e qytetarëve në Shqipëri.
Në një kohë kur Policia e Shtetit duket e pafuqishme për të dërguar pas hekurave personazhet me precedentë të theksuar kriminal që janë të prirur të marrin jetë njerëzish dhe strukturat e uniformave blu akuzohen për lidhje të forta me krimin, edhe më shqetësuese bëhet heshtja që pllakos në Kryeministri.
Edi Rama, shefi i qeverisë që e ka për zakon të bëjë propagandë për arritjet e ekzekutivit edhe kur bilanci i të vrarëve në Shqipëri merr përmasa të frikshme, ndoqi sot të njëjtën strategji, si në të gjitha rastet kur rrugët e vendit janë “larë” me gjak prej atentateve apo plumbave mbi të pafajshmit.
Teksa një kërcënues serial i jetës së të tjerëve dhe i dënuar me burgim për vrasje të bashkëshortes, endej rrugëve me armën gati për qitje, Rama si protektor i sistemit të kalbur të ligjvënies në Shqipëri dhe policisë së inkriminuar zgjodhi “karshillëkun” në Facebook, në vend të një reagimi të denjë si kryeministër.
Shefi i qeverisë katër orë më parë (rreth 2 orë pas masakrës në Paskuqan dhe vrasjes në Kamëz) “mburrej” me një postim në Facebook se ka marrë pjesë në një ceremoni në Peskara të Italisë, ku ai është nderuar me “Urdhrin e Minervës” nga Universiteti Gabriele d’Annunzio”.
E sikur të mos mjaftonte ky postim, propaganda qeveritare nuk është ndalur, pasi Rama postoi sërish një orë më parë në Facebook, kohë kur policia kishte nisur “gjuetinë” për t’i vendosur edhe njëherë prangat Dan Hutrës, këtë herë për vrasjen e tre grave, si një kronikë e një krimi të paralajmëruar.
Edhe në këtë postim Rama nuk denjoi të shprehej mbi tragjedinë duke ndjekur strategjinë e “Kodit të Heshtjes”, por njoftoi se ka përfunduar investimi në nënstacionin elektrik në Vorë.
Me shumë gjasë heshtjen e Kryeministrit do ta pasojë në ditët në vijim, siç gjithnjë ndodh në rast vrasjesh, një postim për arritjet e policisë së tij në vitin paraardhës, me shifra e statistika të fabrikuara në zyrat e INSTAT që tregojnë sipas qeverisë se kriminaliteti në rrugët e vendit ka rënë.
Më një të tillë Rama u mburr rreth dy muaj më parë, teksa sipas shifrave të “partisë”, e cilësonte 2022 vitin që kishte shënuar numrin më të ulët të vrasjeve në tri dekadat e fundit.
Sipas grafikut që tregonte shifrat e përzgjedhura nga Rama, Shqipëria supozohet të jetë një vend ku krimi thuajse nuk ekziston, por janë raportet ndërkombëtare dhe kronika e zezë në media, ato që e rrëzojnë shefin e qeverisë.
Në raportet e Eurojust, DASH apo Komisionit Europian për vendin tonë theksohen si problem bandat e krimit të organizuar, të cilat janë në përplasje të vazhdueshme për larje hesapesh si pasojë e prishjeve të pazareve të drogës në vendet e BE duke prodhuar një numër të lartë viktimash.
Në vetëm 8 muajt e parë (deri në gusht) të vitit 2022, që Rama e cilëson si të suksseshëm në Shqipëri u regjistruan 40 atentate dhe vrasje, ku nuk përjashtohen ato për shkak të konflikteve për drogë por edhe te deri më banalet që nisin me pyetjet: “Pse më sheh”, ose “Përse parkon në vendin tim”.
Me të njëjtin ritëm duket se shifrta po ecin edhe në 2023, ndërsa kryeministri vetëm për nderim të viktimave që humbën jetën në masakrën nga duart e 40-vjeçarit Dan Hutra duhet të kishte ndalur propagandën dhe të kishte marrë guximin që me një mesazh të kërkonte mobilizimin maksimal nga Policia dhe Drejtësia për të parandaluar të tilla krime.
